[dropcap]Э[/dropcap]кономикалул источникрал баян бунни Аьрасатнал Банкрал даврил практика лахьхьин Дагъусттаннал вузирдал студентътурайн оьвтIий бушиву. Мукунма жула студентътурайн Банкрал даврил практика лахьхьин оьвтIий бур Санкт-Петербургливсса банкрал хъунмур управлениялийнгу.

Имара Саидова
Байбихьуну бур аьрзри кьамул буллай. Стажертал кьамул бантIиссар банкирдал давур­тту дачин дурсса департаментирттайн, арцул ва кредитир­ттал, страховой рынокрал ва информациялул технологиярттал цIушиннарду лахьхьайсса 20-ннийн дирсса подразделениярттайн.

— Студентътал практикалийн кьамул буллай байбивхьуру жу ларг­сса шинал, ххуй дирзунни му даврил хIасиллу. ХьхьичIва-хьхьичI Банкран аьркинну бур цала даву кIулсса ва жагьилсса пишакартуран даврил опыт лахьхьин бан бюхъайсса профессионалтал, мунияту жун пикри хьунни укун­сса даву дачин дан. Аьрасатнал Банкрай дурсса практикалул кумаг бантIиссар финансирттал системалувусса цала потенциал хьхьичIунмай бан, — увкунни Аьра­сатнал Банкрал председательнал хъиривчу Руслан Вестеровскийл.

Стажировкалий гьуртту хьун ихтияр дуссар махъва-махъсса курсирай дуклакисса бакалавтурахь, мукунма дях­тта дуклакисса магистртурахь ва пишакартурахь. Анкета дуцIин дан бюхъайссар март зурул 29-ннийн дияннин. Аьрасатнал Банкрал подразделениялул пишакартурал студентътуращал бантIиссар онлайн-тестирдал ихтилат.

Му ихтилатравух бувкIсса студентътал июнь зуруй кьамул бантIиссар практикалийн. Стажировка дикIантIиссар ряхва зуруйсса. ХьхьичIунну стажировка дурсса пишакартал кьамул бантIиссар Аьрасатнал Банк­рай зун.
Гьарта-гьарзану кIул бан ва аьрза булун бюхъайссар http://www.cbr.ru сайтрай.