Дагъусттаннал Росгвардиялул управлениялий хьунни кIанттул органнал дянивсса пут личаврил ва гьаз даврил чемпионат. Шикку гьуртту хьунни ххюра команда, зувиллий кIия спортсмен.

А. Аьбдуллаева
Личлачисса пут дия 24 ккило дусса. Ларгсса шинал кунма, гьашинугу цалчинсса кIану бувгьунни Каспийскаллал ОМОН-далул командалул, арцул медаль лайкь дунни «Ястреб» СОБР-ал спортсментурал, шамилчинмур кIану бувгьунни транспортрай­сса ОМОН-далул цачIун дур командалул. Ххув хьуминнан кубокру, медаллу ва грамотартту дуллунни Управлениялул хъунама, полициялул генерал-майор МахIаммад Баачиловлул.

— Спортраву бюхттул­сса шачIанттуйн лахъаншиврул тIайлабацIулун хъунма­сса захIматгу бишин аьркин­ссар. ХIакьину зу ккаккан бунни зула даража, утти округрал бяст-ччаллавугу зу жула Управлениялул цIа лайкьну дуруччинссар тIисса умуд бур. ЧIа тIий ура зун тIайлабацIу ва цIусса ххувшавуртту,- увкунни М. Баачиловлул.

— Бяст-ччал хъинну ягинсса хьунни, муттаэталгу хьхьарасса бакъая, амма жула спортсментураща ххувшаву ласун бювхъунни,- увкунни Каспийскаллал ОМОН-далул вакил, полициялул майор Л. Валерийл.
Ва бяст-ччалливу ххув хьуми январь зурул ахирданий гьантIиссар Нальчикрайн Ух­ссавнил Ккавкказуллал округрал национал гвардиялул чемпионатрайн.