Декабрь зурул 10-нний агьалинащал ирглийсса хьунабакьаву дунни АьФ-лул ПаччахIлугърал Думалул депутат Аьвдулмажид МахIрамовлул.

Имара Саидова
Ва кьини депутатнал цалчин кьамул увсса МахIачкъалалиясса Абуссупиян МахIмудов увкIун ия медициналул чулухасса кумаг баву тавакъю буллай. МахIрамовлул ванал хIакъираву цIуллу-сагъшиву дуруччаврил министр МахIаммад Ибрагьимовлуйн оьвкуну, тIалав бунни ва масъала хъирив лавну, дузал баву.
Хасавюртлив ялапар хъанахъисса Таибат Акаева бувкIун бия ДГМУ къуртал бувсса цила арснан ЦIуллу-сагъшиву дуру­ччаврил министерствалийхчIин ординатуралувун уххансса направление ласун кумаг бара тIий. МахIрамовлул цала кумагчитурайн тапшур бунни ва иширал ялув бацIан.
МахIачкъалалий ялапар хъанахъисса Замират Гъаппарова бувкIун бия душнин даву лякъин кумаг бара тIий. 2014-ку шинал ванил душнил къуртал бувну бур Дагъусттаннал политехникалул университетрал «Судрал экспертизалул ва криминалистикалул» факультет марцIсса ххювардай. Депутатнал ва масъала щаллу баврил хIакъираву электрон журалул чагъар чивчунни АьФ-лул ПаччахIлугърал Думалийн.
Ва кьини депутатнал кьамул бунни ххуллурду бакьин баврил, аьрщарал ва цаймигу ма­съаларттал хIакъиравусса кумагру тIалав буллалисса агьали.
ЦачIанма бувкIсса агьалинал масъаларттал хIакъираву ккав­ккунни маслихIатру ва тапшур бунни цала кумагчитурайн ми щаллу баврил ялув бацIаву.