Лахьхьу щалагу Аьрасатнаву тIиртIунни Театрданул шин
Гьарта-гьарзасса лагрулий хьунни Театрданул шинан хас дурсса мероприятияртту Дагъусттаннайгу. Дайдирхьунни ми дунияллия лавгсса актертал дакIнийн бичин хIатталлийн лагаврия.
Зулайхат Тахакьаева
Муния махъ соцсетирдай хьунни «Помним! Любим!» тIисса аьпалул акция, жуява батIул хьусса актертурал суратирттащал минная бусласисса.
Дагъусттан Республикалул Культуралул министерствалий, министр Зарема Буттаевал каялувшиндаралу, хьунни Театрданул шинал дан дакIнийсса давурттая бусласисса пресс-конференция. Муний гьуртту хьунни культуралул министрнал хъиривчу Мурад ХIажиев, искусствовед Гулизар Султанова, Оьруснал театрданул директор Тимур ХIажиев, Къумукьнал театрданул каялувчи Мавлет Тулпаров, Ссихьрал театрданул каялувчи Аминат ЯхIияева, театрдал пресс-службардал зузалт, журналистал.
Муния махъ артистуращал дуклаки оьрчIал шарду итабакьлакьисса акциярду хьунни МахIачкъала, Избербаш, Дарбант шагьрурдал школарттай. Театрданул шин тIитIаврин хас дурсса агьаммур мероприятие хьунни Оьруснал паччахIлугърал драмалул театрдануву. Муний гьуртту хьунни Дагъусттан Республикалул БакIчи Владимир Васильев, ХIукуматрал вакилтал, ДР-лул культуралул министр Зарема Буттаева, республикалул министерстварттал ва ведомстварттал каялувчитал. Муния махъ гьарца театрдануву хьунни Театрданул шин тIитIаврин хас дурсса хьхьурду. Лакрал театрданул Театрданул шин тIиртIунни Ж. Мольердул «Кьякьлухун ивхьусса лас» тIисса спектакльданийну.
