«Аьрщи ва агьлулул» редакция барча бунни

[dropcap]Н[/dropcap]оябрь зурул 30-нний МахIачкъалалив, Поэзиялул театрдануву, хьунни «Дагестан» РГВК-лул миллатирттал мазурдий­сса вещаниялул дирекциялул 15 шинал юбилейран хас бувсса шадлугърал мажлис.

Лакку мазрайсса «Аьрщи ва агьлу» передача лакрал агьалинаву хъиннура машгьур хьунни, спутникрайхчIин Аьрасатнал цайми регионнайгу ккаккан дуллан дикIайхту. Лаккуясса хавардах, лакку мазрайсса ихтилатрах, балайрдах мякь бувксса гъурбатрайсса лакран ва передача ссайгъатну дур гьарцагу нюжмардий. Сивсуну учин бучIир, «Аьрщи ва агьлу» миллатрал тарих ва этнографияр, Лакку билаятрал шяраваллавунсса аьр­ххир, миллатрал багьу-бизур, хIакьинусса кьинир куну.

Передачалул автор Карина Далиева ва ванил уртакьтал барча буван Поэзиялул театрданувун бувкIун бия Лакрал райондалул хъунама Юсуп МахIаммадов, вара райондалул КIулшиву дулаврил управлениялул хъунама Явсупи ХIамзаев, райондалул Хъунисриннал советрал председатель, шаэр Даниял Магьдиев, Мариян Илиясовал цIанийсса ихIсандалул «Дара­ччи» фондрал хъунмур Гульшан Хасаева, МахIачкъалаллал №16 школалул лакку мазрал учительница ПатIимат Аьлиева ва цаймигу бусравсса хъамал.

[dropcap]Б[/dropcap]алайрду увкунни ЦIусса­лакрал райондалул Культуралул къатлул худрук МахIаммад Аьлиев­лул ва балай учаврил гьунаргу бусса Карина Далиевал цилвагу. Юсуп МахIаммадовлул ва Даниял Магьдиевлул кIицI лавгунни телеканалданул хъунмасса бутIа бихьлахьишиву миллатрал культура, маз ябавриву, Лаккуй хъанахъимуния, гьарца ххуллу-ххуттая буслай, лакрал цIанихсса инсантурая буслай. Ахирданий Карина Далиевал барчаллагь увкуна редакциялул чIарав бацIан бувкIцириннахь ва цивппа шадлугърайн лаххан­сса лаххиялул дузал бувсса «Бузма» ательерал хъунмур Майя Кьурбановахь.

ХIадур бувссар
П. Рамазановал