[dropcap]В[/dropcap]ай гьантрай Дагъусттаннал Росгвардиялул управлениялул хъунаманал бигарду чIумуйну биттур буллалисса Бадруттин Шагьмурадовлул дуллунни наградартту щалагу Аьрасатнаву хьусса «Ттул Росгвардия» тIисса оьрчIал суратирттал конкурсрай ххув хьуминнан.

Конкурс хьуссия шанна номинациялий: «Яла ххуйма аьра­личунал ва Росгвардиялул зузалал сипат», «Ватандалул къаралданий», «Росгвардиялул кьинилуцIунсса яла ххуймур барча баву». Дагъусттанная конкурсрай гьуртту хьуссия 30-нния ливчусса оьрчIру. «Радуга» тIисса МахIачкъалаллал школалул (НОУ ООШ) 4-мур классрал дуклаки душ Екатерина Гороховал цалчинсса кIану бувгьунни цалчинмур номинациялий. Вава школалул кIилчинмур класс­рал дуклаки оьрчI Тамирлан АхIмаровлул кIилчинсса кIану бувгьунни «Ватандалул къаралданий» тIимур номинациялий. Ххув хьуминнан буллунни дипломру ва «Росгвардия оьрчIал итталух» тIисса суратирттащал­сса жуж.

— Жу ххариссару укун агьам­сса, щалагу билаятраясса оьрчIру гьуртту хьусса конкурсрай жула оьрчIру ххув хьуну. Умуд бур вайннал ттиния тихуннай цаймигу ххувшавуртту ласланссар тIисса. Хъунмасса барчаллагь оьрчIал гьунарду итххяххан бан захIмат бивхьусса нитти-буттан ва учительтуран, — увкунни Бадруттин Шагьмурадовлул.

— Хъунмасса барчаллагь ва конкурс сакин дурсса ва жула оьрчIру муниву гьурттушинна дан кIункIу бувсса Росгвардиялул каялувчитуран. Ттул арс, ссавур духларгун, ялугьлай ия конкурсрал хIасиллу даннин. Гьарца кьини цIухлай ия цува цимилчин уссарив. ХьхьичIунсса кIантту бувгьусса кIул хьувкун, ххаришиврул дазу-зума дакъая. Гихунмайгу цала гьунар итххя­ххан буллансса гъира багьунни, — увкунни Тамирланнул ниттил Юлия АхIмаровал.
Ванал классрал каялувчи Елена Лукинал кIицI лавгунни укунсса конкурсирттай уттиния тихунмайгу гьуртту хъанантIишиву.