Машгьур дуллан бур ххиличIрурду датIаврил культура

[dropcap]Ч[/dropcap]Iал къавхьуну, Австриянал компаниярттал ва Аьрасатнал регионнаясса ишбажаранчитурал арцуцIух, Къизлардай буллай су­кку хьунтIиссар цIинцI-ччюрк хайр бумунийн дуккан дувайсса завод.

З. АьбдурахIманова
[dropcap]В[/dropcap]а иширан хасъсса батIаврий Къизлардал бакIчи Александр Шуваловлул ва ДР-лул экономикалул ва территориал лябуккулул министр ХIусман ХIасбулатовлул ххал бивгьунни завод буваврицIун щаллу хьунтIисса цаппара масъалартту. Масалдаран, завод бакъавцIуну зунтIиссар шанна сменалий. Шикку 2,5 азараксса инсаннан­сса давуртту хьунтIий дусса дур. Дянивну миннал ласайсса харж бикIантIиссар 30 азарда къуруш. Заводрал кумаграйну шинал мутталий ххиличIрурдал 250 азардаксса тонна хайр бумунийн дуккан дан бюхъантIиссар.

ХIусман ХIасбулатовлул кIицI бувунни, республикалий экологиялул проект щурущи дуваврицIун, агьалинаву машгьур дуллан аьркиншиву ххиличIрурду личIи-личIисса бутIрайх дачIаврил культурагу. Мисалдаран, пластикрал шушри ца къуршилувун датIин, пюрун-мах – цамунивун, чагъар-кардон – тамунивун.