НицI

— Гьантлун 60-70 гр. ницIал дукарча, инсаннал чурххал хIал саргъун шайссар, оь ххуй шай­ссар, гемоглобин лахъ шайссар, къюкIлил-туннурдал система цIакь дайссар.

Ссуссулийх бувксса лимондалул ягу пуртихалданул (апельсин) ккири гайкссара ницIащал хIала бувну, дукра дукан хьхьичI ца-ца чяйлул къуса дукарча хъинссар.
— ДачIи лимондалул сок ца стакан щаралархъсса, дюхлулсса щинавун дуртIуну, зунна тIааьнсса куццуй ницIгу хIала дурну, кIира нюжмардий хIачIларча, хъинссар.
— Гъаргъун, марцI дурсса гьивхьхьул ялун дутIайссар зун­ттал ницI. Ва дарув халкьуннал медициналуву ишла бай­ссар операция бувсса, захIматну къашавай хьусса, чурххал хIал чан­сса къашайшалтран, мукунма оьрчIангу.
— Ласайссар 300 г. ницIал, 100 гр. курагул, 1 лимон, 100 гр. кьавкьсса лухIи кякандалул (чернослив), 50 гр. кишмитIутIул, бачIи стакан гьивхьхьул. Кураг, лимон, кякан, кишмитIутIи марцIну шювшуну, кьакьан бувну, дикI гьаяй машиналувух буккан байссар. Ялун дичайссар, ккуччу дурну, мюрш дурсса гьивхьгу, ницIгу. Гьарзат ххуйну хIала дурну пюрундалул банка дурцIуну, холодильникраву ядайссар. Гьантлун шамийлла ца-ца чяйлул къуса канарча хъинссар, иммунитет гьаз дангу, къюкIлил къашайшивурттангу.
-1кг. оьрчIикIурилул (брусника) ларсун, шюршуну, лицIангу диртун, тIаннул оьрчилттух ххуйну ккуччу дурну, гайннуйн 1 кг. ницIалгу дуртIуну, ххуйну хIала дайссар. ЦIакьну кьалакьигу ларкьуну, пюрундалул банкалуву холодильникраву ядайссар.
Атеросклероз:

— 1 кг. ницIал, 5 бакI ххуйну бувтусса лаччул, 10 лимондалул сок ххуйну хIала дурну, гьантлун 4 чяйлул къуса цал архIал, хIаллих цIупIа тIий хIачIларча хъинссар.
Шану къабиллалинан:
— Уттубишин 30-40 минутIрал хьхьичI хIачIаван аьркинссар стакан гъилисса щинал ца къуса ницIалгу дирхьуну.

Яруннил цIуцIавурттан:
-КIяла акациялул ницI дарувссар яруннил цIуцIавурттан (катаракталун, глаукомалун). НицIгу, марцIсса (дистилированная) щингу хIала дурну 1:2 лагрулий, миннул кIунтIру бутIайссар иттав гьантлун кIийлва-шамийлва. Шанна нюжмардува 10 гьантлийсса бигьалагайссар, ялагу тикрал дай­ссар. Вайннул яруннийнсса гужгу чан байссар. Вай кIунтIру хъинссар компьютерданух зузиминнангу.
Давлениялун:

— АцIра грамм ницIал хIала дайссар ца лимондалул сокравух. Уттубишин хьхьичI 1 хъунна къуса дукайссар гъилисса накIлихун ягу чяйлухун.
ЦIуллуну битаннав.

ХIадур бувссар
Т. ХIажиевал