«Шяраваллавуминнал захIматрайнур шагьрурду бакI буклакисса»
Тталаткьини Ххюлуссуннал шяраву хьунни цIусса ФАП тIитIлатIисса шадлугъ.
Гьуртту хьунни муний ДР-лул ХIукуматрал хъунаманал хъиривчу, шяраваллил хозяйствалул министр Аьбдулмуслим Аьбдулмуслимов,
шяраваллил хозяйствалул министерствалул управлениялул каялувчи Эмил Ттаттаев, Лакрал райондалул бакIчи Юсуп МахIаммадов, райондалул азарханалул хъунама хIакин МахIаммад Сулайманов, идарарттал каялувчитал ва цаймигу хъамал.
Зулайхат Тахакьаева
Юсуп МахIаммадовлул кIицI лавгунни махъсса шиннардий хъун хьушиву паччахIлугърал чулухасса шяраваллахсса къулагъас.
— Шяраваллил хозяйствалул министерствалул кашилуцIух Лакрал райондалий бувссар кIива ФАП. Ттигъанну укунмасса ФАП бувну къуртал бувссар Кьубиял шяраву. Шиннардил хьхьичI райондалул кашилуцIух ЧIарттал шяраву буллалисса ФАП-рангу 30 процентрал кумаг бувссар Шяраваллил хозяйствалул министерствалул, — увкунни ванал.
Райондалул хъунаманал барчаллагь увкунни шяраваллил хозяйствалул министрнахь, райондалух дуллалисса къулагъасрахлу, шин ва кIива зурул дянив ФАП бацIан бувсса (буллай байбивхьуну бур 2017 шинал сентябрь зурул ахирданий) «Севкавмонтажстрой» ООО-лул хъунама директор АьвдурахIин ХIаммацаевлухь ва ванал зузалтрахь.
Муния махъ баян бунни Ххюлуссуннал жяматран ххарисса хаваргу – цIусса шинаву буллай байбишинтIий бушиву ЧIурттащату Ххюлусмав ва Буршайн бияннинсса ххуллу.
Ххюлуссуннал жяматрал оьрмулуву агьамсса ва ххарисса иш кIицI лаглай, шяраваллил администрациялул бакIчи Шамил Абачараевлул бувсунни 1960-ку шиннардий бувсса ФАП лекьавайсса тагьарданий бивкIшиву. ХIакьину Ххюлусмав ялапар хъанай усса ур шанттуршлий ххюцIала инсан.
— ХIакиннал кумаг яла аьркин шай кIинтнил минардая бивзсса ризкьичитуран, гъаравух, дякъивух зузисса хIухчалтран, — увкунни ванал. Барчаллагь увкунни ФАП бан чIарав бавцIуцириннахь.
ФАП тIивтIушиврул лишанну хъанахъисса ятIул лента кьувкьунни Юсуп МахIаммадовлул, Аьбдулмуслим Аьбдулмуслимовлул ва МахIаммад Сулаймановлул.
Аьбдулмуслим Аьбдулмуслимовлул кIицI лавгунни махъсса шиннардий Аьрасатнал Шяраваллил хозяйствалул министерствалул хъуннасса къулагъас дуллай бушиву шяраваллах «Устойчивое развитие сельских территорий» тIисса программалул лагрулий. Ванал кунни укун:
— Гьашинусса шинал билаятрал бакIчи Владимир Путин Краснодар шагьрулий хьунаавкьунни шяраваллил хозяйствалул аралуву зузиминнащал. Октябрь зуруй Ставрополь шагьрулий хьусса аграрийтурал форумрай хъуннасса къулагъас дуллай бия шяраваллал буруккинттах: ххуллурду баврих, чани буцаврих, щинал дузал баврих, ФАП-ру, школартту баврих. Регионнал министртураягу тIалав буллай бур шяраваллал кIанттай зун ччисса жагьилсса пишакартурансса оьрмулул шартIру къулай дансса программартту кIантту-кIанттурдай щурущи дуллан.
2018 шинал Лакрал райондалун министерствалул чулуха бувссар кIира грант ласунсса кумаг 4.5 миллион къуруширттансса. Ца – лухIи ризкьи, цагу – ятту ябуллансса. Арулва миллион къуруширттал кумаг бувссар оьллал фермарду тIитIин. Зий дуссар шяраваллал пишакартурал оьрмулул шартIру къулай дансса программарду. 2017-2018 шиннардий, паччахIлугърал чулухасса кумаг хIисаврай, итадаркьуссар 4 миллион ва 243 азарда къуруш арулва кулпатран, миннава – ряха жагьилсса пишакарнан къатта бансса (аьмну 822 кв.м.). Вания тихунмайгу зунтIиссару шяраваллал оьрму къулай баврил ялувсса инвестицион проектирдал ялув.
Министерствалул чулуха ХIурматрал грамотартту дуллунни «Севкавмонтажстрой» ООО-лул хъунама директор АьвдурахIин ХIаммацаевлун ва ванал хъиривчу Игорь МахIаммадовлун.
АПК хьхьичIунмай бан буллалисса захIматрахлу ХIурматрал грамота дуллунни Юсуп МахIаммадовлунгу.
Эмил Ттаттаевлул барчаллагь увкунни кьянатсса шартIирдай шяраваллаву ялапар хъанахъисса инсантурахь.
«Шяраваллаву ялапар хъанахъиминнал захIматрайнур шагьрурду бакI буклакисса», — увкунни ванал. Махъ буллунни ванияр тихунмайгу шаннагу лакрал райондалул шяраваллал кIанттай къулайшиннарду дан чIарав ацIавансса.
ФАП бан чIарав бавцIуминнахь ва буллай бивкIсса строительтурахь барчаллагь увкунни Лакрал райондалул азарханалул хъунама хIакин МахIаммад Сулаймановлул ва Ххюлуссуннал ФАП-рал хъунмур Жамила Къунжуевал.
