Декабрьданул 12-нний ДР-лул ХIукуматрал Председательнал 1-ма хъиривчу ХIажимахIаммад ХIусайновлул ва ДР-лул ХIукуматрал Председательнал хъиривчу Владимир Лемешкол кьамул бунни цалва масъалартту дузал буван бувкIсса инсантал.
Республикалул ялапарлувтал ХIажимахIаммад ХIусайновлучIан бувкIунни мунал каялувшиву дуллалисса экономикалул ва финансирттал хIакъиравусса масъалартту бартбигьаву мурадрай. Миннал тавакъюрду бия МахIарамккантуллал райондалий буллай бачIину ливчIсса школа бакIуйн буккан буван паччахIлугърал чулухасса кумаг баврил хIакъираву, Дарбантливсса аьрщарал участокрай ихтияр дакъа къатта баву закондалийну душиврул хъирив лаяврил хIакъираву, «Дагэлектромашрайсса» базар ччуччаврийну базаллуву маша буллай бивкIминнал зараллу лахъаврил хIакъиравусса ва цаймигу.
Ми циняв масъаларттал хIакъираву ХIажимахIаммад ХIусайновлул бунни аьркинсса маслихIатру ва цаппара къуллугъчитуран дунни тапшурлугъру.
Владимир ЛемешкочIан инсантал бувкIунни хъунмурчIин ялапар хьунсса къатрал хIакъираву.
ХIадур бувссар
ХI. Аьдиловлул
