Декабрь зурул 6-нний Ккуллал райондалул администрациялул залдануву хьунни райондалул депутатътурал сессия.
Микку гьуртту хьунни райондалул бакIчинал хъиривчу Давдиев Анатолий, шяраваллал бакIчитал, идарарттал каялувчитал. Сессия бачин бувну ия райондалул собраниялул председатель Оьмаров Гъази.
Сессиялий ххал бивгьунни мукьва масъала: нанисса шинал 9 зурул райондалул бюджет биттур баву; 2018-ку шинал райондалул бюджетраву дахханашивуртту даву; инсаннал хъуслиясса налог ласаву; 2019-ку шиналсса райондалул бюджетрал проект ххал дигьаву.
КIицI бувсса масъаларттан хас бувсса ихтилатру бувна Финансирттал управлениялул каялувчи Амучиев Кьурбаннул, экономикалул отделданул каялувчи Рамазанов Морислул, райондалул бакIчинал хъиривчу Давдиев Анатолийл, цаппара депутатътурал ва шяраваллал бакIчитурал. Сессиялий ххал бивгьусса циняв масъаларттал хIакъираву кьамул бунни хIукмурду.
