Декабрьданул 30-нний 85 шин хъанай дур Ссу­хъиял шяраватусса захIматрал ветеран, ЗахIматрал ЯтIул Ттугълил ордендалул лауреат, Лаккуй совхозру-колхозру ччаннай дацIан дуллай, зий, захIмат буллай ивкIсса инсан,

 ХIусманкьадинал арс Саэдов Саэдлун. Мунащал хьунабакьин бувкIсса чIумал, ттул хьунийн увккуна марцI-кIяласса гьухъувусса, артист куна, авкьусса, лазилавкьусса адамина.

---

ПатIимат Рамазанова
Ссухъиял чIирисса шяраву байбихьулул школа ба­къа ба­къанавхьур, чIунар­хIал­миннащал ва занай ивкIун ур чIаххуврайсса Вихьуллал школалийн, 7 класс къуртал буваннин. Хъуними классру тIурча, був­ккуну бур ЧIяйннал школалий.
Аьрая мушакъат хьуну увкI­сса буттал ванан маслихIат бувну 10-мур класс Гъумук къуртал буван, цIа дурксса школа бушиврийн бувну.
— Гьарзат аьрайн гьан дуллай, колхозирттай ккаши бикIайва, уртту- щинай яхъанай бия хъунмурчIин, Ахъушиял райондалийн лавгун, колхозрал бригадирну зузисса ппу хъа ва лухIи хъюрув ларсун учIайва, ми дия яла кьюркьуми, уртту-щинащал хIала-ккала дурну дуканмур миннуя дувайссия», — тIий дакIнийн бутлай ур Саэд.

[dropcap]Ш[/dropcap]кола къуртал бувайхту, буттал ванахь цу хьун ччай ура куну цIувххуну бур, вагу ташвиш хъанай ивкIун ур, цумур пиша язи бугьан хъинавав тIий. Цала шярава дуккин ччисса инсан къаикIайва тани, дуккин­сса шартIругу дакъая тIий ур. Колхозрал кьай духхай машиналул ва ликкан увну ур шяраваллил хозяйствалул институтрал хьхьичI. Му институт язи бугьаврил сававгу диркIун дур 19 къуруш стипендиялул душиву. Институт бувккуну махъ лавгун ур зун хъунама агрономну Бущихъав. КIира шинава Яру­ссаннайн, ва зузисса кIанайн, бувкIун бур Буйнакскаллал педучилище къуртал бувсса ванал кулпат Забизатгу.

[dropcap]Б[/dropcap]илаятрал компартиялул цалчинма секретарьну зузисса Хрущевлул таний хъунмур къулагъас дуллали бувну бивкIун бур шагьнал лачIал бакIлахъия чIяру даврих. Зун гъира бусса Саэд Бущихъав цала бюхъу-гьунар ккаккан буллай ивкIун ур, хIажлул лачIал бакIлахъия гьарза дувансса «квадратно-гнездовой кьяйдалул» механизм гьануну ларсун. Яруссаннай ванал цIа ппив хьуну дур цIанихсса агроном хIисаврай, 80-90 центнер ца гектардания хIажлул лачIал ласайсса ккаккияртту хьун дурну дур. КIиккувасса яручунан Социалист ЗахIматрал Виричунал цIагума дуллуну дур. Передовик хIисаврай, Саэдлул цIагу машгьурну диркIун дур, ванахь школалий химиялул, биологиялул дарсругу дихьлахьу куну миннат бувну бур, увчIуну ур райкомрал комсомолданул бюрорал членнугу. Къутаннай лекциярду ккалай ухьувкун, партиялул обкомрал лекторгу хьуну ур. Кьамул увну ур партиялувунгу.

[dropcap]Ш[/dropcap]яраваллил хозяйствалул танисса министр МахIаммад Абуев Бущихъав учIайхту, захIматрал гьаз ув­сса яруссаннайсса лаккучуна­хьхьун буллусса цалчинмур суалгу бивкIун бур: «Гъумукун къаучIанссияв?» тIисса. Цува тIалавну ва аьркинну унийн цукун къагьанссия! Тани авкьатсса ГьунчIукьатIрал колхозрал гьанулий хIасул дурну диркIун дур ккаккиялунсса хозяйство. Миккугу хъунама агрономну зий, ванал цала бюхъу ккаккан бувну бур. ХьхьичIунсса пишакарнай ябавцIусса, тани кIирагу райондалул (Ккуллал ва Лакрал) цачIусса хозяйствалул управлениялул хъунаману зузисса ОьмархIажи ЦIаххаевлул цала хъиривману зун увцуну ур. Райондалул цалчинма секретарьну зузисса КIулушацIрал шяраватусса МахIаммад Рамазановлул, цува лаваймур партшколалийн дуклан нанийни, обкомрайн лавгун, цала кIанай Саэд итан маслихIат бувну бивкIун бур. Ванайн обкомрайн оьвкуну бур шяраваллил хозяйствалул масъалартталсса буллалисса Шихсаид Шихсаидовлул. Амма 32 шинал оьрмулувусса Саэдлул му даву бакIрайн къаларсун дур, тIайланма увкуну бур «на партиялул даврий зий къаивкIра уттинин», куну.

ОьмархIажи ЦIаххаев райкомрал секретарьну ивтун ур, Саэд тIурча – шяраваллил хозяйствалул управлениялул хъунаману. Ряхра шин дурну дур ва даврий. ХIукуматран буржлувну личIлай, колхозирттал ишру лекьлай бавчу­сса ппурттуву, Аьрасатнаву, мукунма жучIава республикалийгу махъун да­гьлагьисса колхозир­ттал гьанулий совхозру хIасул дувансса хIукму бувну бур партиялул, мукун райондалий 4 сов­хоз хIасул дурну дур, миннувун дагьлай диркIун дур 12 шяравалу. Саидлуйн тапшур дурну дур Хьурттал совхоз. ЧIал къархьуну Хьур­ттал совхозрал цIа дурккун дур гьарца кIанттайх. Му ппурттуву Ххутрал колхоз диркIун дур буржирдалун дагьну, зузалтран хIакьвагу булун къашайсса даражалийн дагьну. Ххутрал делегация СаэдлучIан бувкIун, тавакъю бувну бур, цалламур хозяйствагу ххюйлчинмурну совхозравун кьамул дува тIий. Кьамул дурну дур мугу.

— ХIарачатран барачат учай­хха, на каялувшиву дуллалисса ппурттуву ацIазарва тталуяту кьуазарва хьуссия, 100 ттан 103 чIи бучIан байссия, – гъирарай буслай ур Саэд. – ЛухIи ризкьилул 3500 бакI хьуссия, миннувугу сайки азарва оьл, 500 най бувссия. Сокру дувайсса цехгума бувссия, Гуржиянава пишакаргу учIан увну. ХIухчалтран кIива куклу машина буллуна, дояркан Лениннул орден дуллуссия. Му чIумал ттунгу дуллуна ЗахIматрал ЯтIул Ттугълил орден. Республикалий сов­хозирттал дянив жул совхоз цалчинмур кIанттай дуссия, мукьра шинай дуссия ттул сурат Республикалул ХIурматрал ул­ттуй. ХьхьичIунсса совхозрайн иян Даниялов учIайхтугу, ттун тIааьнну бия му ттучIава ли­ккаву…
Ванал дурцири давурттал сияхIрах ябитарчанма, чIалай бур ва цуксса захIмат ххирасса ва бюхъу-бажар бусса каялувчи ивкIссарив.

Дур ванал чIярусса медаллу ва хIурматрал грамотарттугу.
1966 шинал Краснодардай хьусса Ухссавнил Ккавкказуллал районнал шяраваллил хозяйствалул управлениярттал хьхьичIунми хъуниминнал семинарданийгу гьуртту хьуну ур. Амма, чIун наниссаксса, оьрчI ва душру шагьрулий дуклай бухьувкун, Саэдгу шагьрулинай кIункIу тIий ивкIун ур. Ванал тавакъюгу бувну бур цува шагьрулийн зун тIайла уккияра куну. Ивтун ур Овцепромрал гендиректорнал хъиривчуну. Ва цу­ппагу тIайланма Москавлийн багьайсса идара бивкIун бур. Зий ивкIун ур мукуна Дагагропромхимия тIисса хъуннасса хозяйстволийгу.
Оьрмулул 70 шин хьуннин ца­ла кIулшивурттугу, бюхъугу агьалинан мюнпатну ишла буллай ивкIун ур Саэд.
НахIуну оьрму бувтсса Забизатлущал шанма душгу, ца арсгу лайкьну чивун бу­ккан бувну бур. РяхцIаллахъул шинну Саэдлущал цачIу дирчу­сса Забизат бур: «ЗахIматсса, жаваблушинна дусса давур­ттай лас зий ивкIнавхьур, ванал ичIаллил цIакьсса къинттану, чIарахбацIуну бикIан хIарачат бувссар, дачIи ссятрайвагу къа­ххавхссару, хIалалну-хIалимну оьр­му бувтссар», — тIий.

[dropcap]С[/dropcap]аэдлул, буниялттунгу, чIя­вуссаннал зукьлулувух ишинну оьрму бувтун бур. Гъумук 17 шин дурну дур вайннал, ужагърай тачIав хъамал чан хьуну бакъар, шагьрулийн бизайхтугу вайннанния бухху- букку чан хьуну бакъар. Саэдлул хъинну ххуйну хъатIай тямадашивугу дувайсса дур. Забизат буслай бур, ласнал дурцири ххуй­сса давурттавух душиву личIи хъанахъисса лас-щар, маслихIат бувну, тий- ший бацIан къабитаву. Ва буниялттунгу, шяраваллил жяматран, лагма- ялттуминнан, кIулминнан акъа чара бакъа­сса, аьркинсса, аькьилсса хъуначу ур. Ванан цанмагу инсантал ххирану бур, цувагу инсантуран ххирасса ур.
Барча дуллай буру вил 85 шинал юбилей, буттауссу Саэд! Оьрму лахъи буваннав! Ина ва вил Забизат наслулул ххари булланнав!