ЦIаххуйл арс Аьбдуллаев Кьади
Оьрмулул 51 шинаву аьпалухьхьун лавгунни ххаллилсса лаккучу, Гъумучатусса Явубукухъал ЦIаххуйл ва ГьунчIукьатIатусса Марзижатлул арс Кьади.
Кьади увссар 1967 шинал. Гъумук 8 класс бувккуну, Хасавюртуллал шяраваллил техникумгу къуртал бувну, Гъумук Сельхозтехникалул техник-механикну зий уссия. Яла, ювелирнал пиша лавхьхьуну, мусил усттарну зий уссия.
Кулпат бувну махъ, 1993 шинал, Нижневартовскалийн лавгун, уттинин тих цала пишалий зий уссия.
Кьади уссия дакI-аьмал хъинсса, инсантуран кумаг буван хIадурсса, гьалмахтуран, гъан-маччанан хъинну бусравсса чув.
Цибанссар, хар-хавар бакъасса бивкIу нясив хьунни, Лаккуйн увцуну, увччунни буттал аьрщарай.
Цал бунагьирттал аьпа баннав, рухI хъинний дишиннав, алжаннул ххари аннав. Ванан бакъасса оьрму ванал кулпатран Марияннун ва шанмагу душнин булуннав. Кьадинал кьурчIисса бивкIулул жижара буллай буру уссурваврахь ва гъан-маччанахь.
Гъумучиял ва ГьунчIукьатIрал жямат
Кьадинал бивкIулул хавар бавсса кьини
Уссай, ссу бивчIа чин
Ссугу бакъар вил,
Арс, бава дирчIа чин
Нинугу дакъар.
Мусил кару дусса
Жул мусил усттар,
Зий къадацIай кару
Цукун дацIан дав?
«Ссурахъуй» тIий акъа
СсихI къадуккайва,
Гьар ялун увкIтари,
Хъяйна учIайвав.
Ца ххираяхха вин
Ва Лакку кIану —
Гьар шинах учIайвав
Буттал шяравун.
Ссурахъал цаймигу
Ттул ялагу бур,
Амма ина ияв
Лап ляличIисса.
Вил дада ва мямма,
МакIра аьтIисса,
Вил бивкIулул хъирив
Биявав бувкIун.
Тти шанашу, Кьадий,
НахIу шанаву,
Шанашу вичIилий
Га Хъуннеххахгу.
Вих аьтIисса вил ссурахъу ХIурия
ш. ГьунчIукьатIи
МахIаммадлул арс ХIажиев Шамил
Декабрь зурул 11-нний жуятува лавгунни ххаллилсса лаккучу, чIярусса шиннардий Тарумовкаллал райондалийсса мелиорациялул давриха зий ивкIсса ХIажиев Шамил МахIаммадлул арс.
[dropcap]Ш[/dropcap]амил увссар сентябрь зурул 7-нний 1941 шинал Лакрал райондалийсса КIулушацIрал шяраву. Буттал шяраву школагу къуртал бувну, 1959 шинал ванал захIматрал оьрму байбивхьуну бур МахIачкъалаллал Дагстройрал СУ-1 трестрай плотникну. Вара даврий зий ивкIун ур М. ХIажиевлул цIанийсса заводрайгу.
1962-1965 шиннардий къуллугъ буллай ивкIун ур Совет Аьралуннаву. 1965 шинал Шамил МахIаммадович увххун ур Новочеркасскалийсса инженер-мелиоратив институтравун. 1970 шинал ванан дуллуну дур инженер-гидротехникнал квалификация.
1970-1972 шиннардий зий ивкIун ур ДАССР-данул Минводхозрал хъунама инженерну. 1972 шинал ивзун ур Тарумовкалийн. Шикку кIира шин дурну дур ПМК-лул хъунама инженерну зий. 1974-1975 шиннардий зий ивкIун ур РСО Тарумовкаллал УОС-рал хъунаману.
40-нниха лирчусса шинну дурну дур Шамил МахIаммадовичлул мелиорациялул давриха зий. Цала даву ларайну кIулсса профессионал ушивруцIун, ва уссия ялун нанисса никиран насихIат бусан кIулсса бусравсса, хIурмат-кьиматрайсса каялувчигу. Агьалинащал хIал бавкьусса, жяматрал иширттавух мудан хIала уххайсса ушаврийну цимилгу увчIуну уссия Тарумовкаллал администрациялул депутатну. Къуллугърал бурж дакIнихтуну биттур баврихлу МахIаммад лайкь хьуну ур «ДР-лул Шяраваллил хозяйствалул лайкь хьусса зузала» тIисса бусравсса цIанин, ХIурматрал грамотарттан, Барчаллагьрал чагъардан.
Шамил МахIаммадовичлул цала кулпат Зубайрижатлущал, цинявннан эбратну хъунигу бувну, чивун буккан бувссар арс ва кIива душ.
Шамил дунияллия лагаврил кьурчIишиву кIидачIлай, жижара буллай буру кулпатрахь, арснахь, душваврахь, миннал наслулухь ва цинявппагу гъан-маччацириннахь.
Имандалий лавгун лякъиннав, алжаннул ххари аннав.
КIулушацIрал жямат
МахIаммадлул душ МахIаммадова Умамат
Декабрь зурул 10-нний ахиратравун лавгунни дакI-аьмал аьчухсса, иминсса хасиятрал инсан, КIулушацIрал шяравасса МахIаммадлул душ Умамат МахIаммадова (ХIажиева).
Умамат бувну бур КIулушацIрал шяраву 1937 шинал ноябрь зурул 22-нний. Шяраву школагу къуртал бувну, дуклан бувххун бур Буйнакскаллал педучилищалувун. 1971 шинал институт къуртал бувния шихунмай, 55-нниха лирчусса шиннардий зий бивкIун бур оьрус мазрал дарсирдал учительну. Цуппа зузисса коллективраву Умамат мудангу хьхьичIунну ва хIурмат-кьиматрай бивкIссар.
Хъинну ххирасса бия Умамат гъан-маччанан, чIахху-чIарахнан, кIулцириннан.
Умамат ахиратрахьхьун лагаврил кьурчIишиву кIидачIлай буру ванил оьрчIахь ва цинявппагу гъанцириннахь.
Алжаннул ххари баннав, махъминнал оьрмурдай барачат бишиннав.
КIулушацIрал жямат
