ЧIивитIу ххассал бунни

Тталаткьини, декабрь зурул 11-нний, ДР-лул ХIукуматрал Председатель Артем Здунов, ДР-лул БакIчинал ва ХIукуматрал администрациялул каялувчи Владимир Иванов 

хьунабавкьунни ххюлчинмур зивулия багьсса 5 шинавусса душ ххассал бувсса ТIагьир МахIаммадовлущал ва Айдамир Куйдуевлущал. Владимир Ивановлул барчаллагь увкунни къучагъсса тIул дурминнахь.


 

А. Аьбдуллаева
— Ххюлчинмур зивулия багьну нанисса 17 кило дусса душ ххассал бан гьарицама къаххяххантIиссия, зу зула инсаншиву ккаккан дунни, — увкунни ванал.
— Укунсса тагьарданувун ччима агьан бюхъайссар, амма мукунсса чIумал цума ци зун икIайрив инсаннал тарбиялул ишри. Хъунма­сса барчаллагь зул нитти-буттан, — увкунни Артем Здуновлул.

Транспортрал компаниялул диспетчер Айдамир Куйдуевлул бувсунни чIавахьулттил карнизрацIун лавчIсса чIиви душ маршруткалий зузисса цала дус ТIагьир МахIаммадовлун ккавкшиву ва мунал оьвкушиву цайнма кумагран. Кару итххярххун, душ чIавахьулттия багьну бур. Му ппурттуву, нину ттучандалийн дурккун, душ цуппалу бивкIун бур шаппа. Багьсса душ кIиягу адаминал бувгьуну бур. Вайннал душ ххассал буллалисса куц видеокамерардай чIалай бур.

– Ва ролик щалагу билаятрал инсантуран ккарккун дур. ЧIивисса душ ххассал бувсса зуйн барчаллагьрайсса аьрасатлувтал оьвтIий бия ттуйн личIи-личIисса субъектирдая, — увкунни Владимир Ивановлул. Ванал бувсунни цала Артем Здуновлущал архIал къучагътуран паччахIлугърал наградартту дулун Дагъусттаннал БакIчи Владимир Васильевлухь тавакъю бантIишиву. Ххассалбувултрал чувшиврун лавайсса кьимат бивщунни Дагъусттаннал МЧС-рал Агьаммур управлениялул хъунама Нариман КазимахIаммадовлулгу.

— Укунсса иширттащал уттинин хьунакъабавкьуну бивкIнугу, канилу цичIар къадиркIнугу, иш багьний чаран лякъин бювхъунни зуща. Жу жула ведомстволул наградар­тту, Ххассалбувултрал кьини, декабрь зурул 27-нний, жучIанма оьвкуну зун дулуну — увкунни ванал.
Айдамир Куйдуевлул бувсунни цалагу ххюва оьрчI бушиву, багьавайсса душ ккаккайхту, мугьлат бакъа кумаг бан левчушиву.
Дагъусттаннал Халкьуннал Мажлисрал Председательнал хъиривчу Камил Давдиевлул кIицI лавгунни ххассалбувултрал зунттал чувнан лайкьсса тIул дуршиву.
Ахирданий къучагътуран дакIний личIансса бахшишру дунни.