Декабрьданул 3-нний ДР-лул БакIчи Владимир Васильевлул каялувшиврий ххал бивгьунни, тIабиаьтрал тагьар захIмат хьувкун, чирахъру лещан баврил хIакъиравусса масъала.
Вай гьантрай, гъараллугу лачIлай, марчгу гужлан хьуну, шагьрурдай ва районнай токрал ххаллай аварияртту шаврил зараллу бухлаган баврия ихтилат бунни «Дагестанская сетевая компания» АО-рал управляющий директор Муртазяли Гитинасуловлул.
«ХIакьинусса кьини оператив тагьар цила кьяйдалийсса дур. Авария шаврийну чирахъру лешлай бакъар, зий буру муданмасса низамрай. Декабрьданул 1-2-нний жучIара дунни гъараллу ва гьаз хьунни гужсса марч. Му тагьар дия хъунмурчIин МахIачкъалалив, Дянивмур ва Ухссавнил зонардай, хаснува Казбекуллал райондалий», — увкунни Гитинасуловлул.
Мунал тIимунийну, МахIачкъалалив зузисса 120 токрал линиярттава къазий диркIссар 7, ми линияртту диркIссар хъунмурчIин шагьрулул къирагъирттай. КIира кьинилул мутталий, муштаритурачIансса токрал ххаллу дарзуну, ток нани бувссар.
ДР-лул премьер-министр Артем Здуновлул бувсунни Аьрасатнал Минэнерголущал цачIу электросетьрал ва газрал хозяйство цIу дуккан дуллай байбивхьуну бушиву.
БатIаврий МахIачкъалаллал, ЦIуссалакрал ва Казбекуллал районнал бакIчитурал бувсунни ми кIанттурдай иш-тагьар ци даражалий дуссарив. ЦIуссалакрал райондалул бакIчи МахIаммад-ХIажи Айдиевлул бувсмунийну, вай гьантрай 9 шяраву чирахъру левщун бивкIссар, миннувасса 7 шяраву токрал ххаллу дазин бювхъуну бур ца гьантлул дянив. Мунал бувсунни чирахъру лещаврил сававирттал хIакъиравугу. Миннал ихтилатирттах вичIи дирхьуну махъ Владимир Васильевлул районнал бакIчитурайн тапшур бунни миннал каялувшиврийсса районнай агьамсса масъалартту чялишну дузал буллан.
«Ххюра шинал мутталий жува аьркинссар Дагъусттаннай цила кIанайн бувтун дузал буван агьали токрал щаллу баврил масъала», — увкунни республикалул каялувчинал.
БатIаврий ихтилат хьунни ток ва газ бацлацисса иширттая ва мукунсса иширттал хьхьичIалу кьукьинсса чаранная.
