[dropcap]Ш[/dropcap]адлугърал батIаву тIитIлай, Владимир Васильевлул цинявннахь барча кунни ялун нанисса ЦIусса шин. «ХIакьину жува хьунабакьлай буру аьдатравун дагьсса даврий – дурсса давуртту кIицI дуван. Ва къатлуву бур жулва барчаллагьран лайкь хьусса инсантал», — увкунни мунал.
Республикалул каялувчинал личIину кIицI дунни 2 дагъусттанлувнал дурсса виричусса къел, миннал ххассал бувссар 5-мур зивулия багьсса 5 шинавусса душ. Миннан дуллунни «За заслуги перед Республикой Дагестан» тIисса орден. Дагъусттаннал БакIчинал личIину кIицI бунни мукунма учительтурал, медициналул , шяраваллил захIматкашнал, промышленностьрал предприятиярттал зузалтрал, ххассал бувултрал бивхьусса захIмат.
Яла дуллунни наградартту. «За заслуги перед Республикой Дагестан» тIисса орден дуллунни «Пилот» МТК ООО-рал диспетчер Айдамир Кулдуевлун ва мува предприятиялул шофер ТIагьир МахIаммадовлун ( 5 шинавусса душ ххассал баврихлу), РАН ДНЦ-нул этнополитикалул ахттарчи, хьхьичIунсса элмийсса зузала Низами Казиевлун, Халкьуннал Мажлисрал комитетрал председательнал хъиривчу ХIамидуллагь МахIаммадовлун, Аьрасатнал Художниктурал союзрал Дагъусттаннал отделениялул председатель Кьурбанаьли МахIаммадовлун, художник-скульптор Аьли-ХIажи Сайгидовлун.
«Ниттил» орден дуллунни Дарбантуллал райондалиясса чIявусса оьрчI-бакI бусса нину Магьизад Аьппасован.
«За вклад в социально-экономическое развитие РД» тIисса медаль дуллунни «ЗАО Мушарака» ООО-лул хъунама инженер Закир Басриевлун.
Аьрасатнал культуралул зузалтрал профсоюзрал Дагъусттаннал республикалул организациялул председатель Марзижат Буттаеван ва Дарбантуллал райондалул «Нариман Аьлиевлул цIанийсса» АО-лул тракторист Аьли АхIмадовлун дуллунни «Къучагъсса захIматрахлу» тIисса медаль.
Ялагу цаппараннан дуллунни мукунна «Буттал кIанттухсса ччаврихлу» тIисса ХIурматрал грамотартту ва хIурматрал цIарду.
