Дагъусттаннал БакIчи Владимир Васильевлул цалва контрольданийн лавсунни Буйнакскалий буллай бивкIсса ламу лекьаврил масъала. Мунил хIакъираву бувсунни республикалул каялувчинал ва зурул 26-нний хьусса оператив батIаврий.
Декабрьданул 25-нний МахIачкъалалия Буйнакскалийн – Лаващав – Гъунив нани ххуллул 35-мур километралий буллай бивкIсса ламуйн бетон бутIлатIисса чIумал, ламу левкьун бивкIссар.
БатIаврий республикалул каялувчинахь бувсунни кIа иширал ва кIикку хьусса зараллу бухлаган бансса давурттал хIакъираву.
Ламу буллалисса идаралул вакил Шарапуттин ВахIидовлул бувсунни ламу лекьаврийну зараллу хьуминнан ва миннал кулпатирттан аьркинсса кумаг бантIий бушиву. «Ламуй хьусса иш-тагьарданул хъирив лавну, кIа бакьин бан аьркинссар ччясса мутталий», — увкунни Владимир Васильевлул. Мунал мукунма баян бунни левкьсса ламу бакьин баврил масъала цалва контрольданийн лавсун бушиву.
Хьусса иширал хIакъираву буслай, ДР-лул транспортрал ва ххуллул хозяйствалул министр Ширухан ХIажимурадовлул баян бунни зарал бивну бушиву 2 инсаннан, миннан аьркинсса кумаг бувну бушиву, миннал оьрмулун нигьачIаву дакъашиву. Мунал тIимунийну, цIана буллай бур экспертътурал комиссия, мунил хIасиллайну кIул дантIиссар ламу лекьаврил савав.
ХIадур бувссар
ХI. Аьдиловлул
