Лайкьну хьунадакьинну

Дагъусттан Республикалул Культуралул министерствалий хьунни Театрданул шинан хасну республикалий дан дакIнийсса мероприятияртту, агьамсса проектру ххал дигьлагьисса пресс-конференция.

Муний гьуртту хьунни министр Зарема Буттаева, министрнал хъиривчу Мурад ХIажиев, М. Горькийл цIанийсса Оьруснал паччахIлугърал театрданул директор Тимур МахIаммадов, хъунама режиссер, Аьрасатнал магьирлугърал лайкь хьусса ишкка­кку Мавлет Тулпаров, Ссихьрал театрданул каялувчи, Аьрасатнал магьирлугърал лайкь хьусса иш­ккакку Аминат ЯхIияева, театровед, Аьрасатнал магьирлугърал лайкь хьусса ишккакку Гулизар Султанова.

Зарема Буттаевал кIицI лавгунни ялун нанисса шин дагъусттанлувтуран дакIний личIантIишиву республикалул хьхьичIунсса театрдал коллективирттал хъунисса ва яргсса проектирдайну.
— Махъ бакъа, ва шин респуб­ликалул оьрмулуву хьунтIиссар агьамсса ишну. Му дикIантIиссар театрал проектирдал, магьирлугърал акциярттал авадансса. Ми иширттайн кIункIу бантIиссар бюхъайссаксса чIявусса агьали, хаснура хъирив нанисса ник, — увкунни Зарема Буттаевал.

Ялун нанисса шинал жула рес­публикалий федерал лагрулий хьунтIисса проектруну министр­нал кIицI лавгунни БРИКС-равун бухлахисса билаятирттал (Аьра­сат, Бразилия, Индия, Китай ва Кьиблалул Африка) дянив­сса дунияллул халкьуннал Ссихьрал театрдал фестиваль «Волшебный мир театра кукол», Каспий хьхьирицIухсса паччахIлугъирттал миллатир­ттал театрдал фестиваль; Каспий хьхьирицIухсса билаятирттал ва Аьрасатнал регионнал халкьуннал театрдал фестиваль «Театр традиций»; магьирлугърал ва кIулшиву дулаврил проект «Живые театральные уроки»; республикалул школарттал дуклаки оьрчIал дянивсса ниттил мазурдий литературалул ва музыкалул произведение щаллу баврил конкурс «Щаращи»; хъуннасса магьирлугърал программалущалсса дунияллул халкьуннал дянивсса театрал форум.

Дунияллул халкьуннал лагрулийсса хъунисса проектру ба­къасса, республикалул театрдал бан дакIнийсса проектирдавух бусса бур хъун хъанахъисса никиран театрал магьирлугъ машгьур дуллансса проектру. Миннул сияхIрай бусса бур Дагъусттаннал опералул ва балетрал театрданул оьрчIансса проект «Прогулка по театру», Ссихьрал театрданул хIадур був­сса проектру (конкурсру, смотрду, выставкарду) ва «ОьрчIан ва чIаважагьилтурансса театр» тIисса щалагу Аьрасатнал театрал нюжмар. Миннущалва щурущи бан дакIний бусса бур гьарца шинал зузисса проектругу «Мастера сцены – жителям Дагестана», «Культура – детям Дагестана». Вай бакъа­сса ялагу дакIний бусса бур дан Аьрасатнал театрал деятельтурал Да­гъусттанналмур отделениялул юбилей, республикалул театрал магьирлугърал ишккаккултрал юбилейрду, аьпалул мажлисру.
БРИКС-равун бухлахисса билаятирттал дянивсса дунияллул халкьуннал Ссихьрал театрдал фестивальдания балжину бувсунни Аминат ЯхIияевал. Фестиваль хьун тIий дусса дур Дагъусттаннал хъуншагьрулий май зурул 26-нния июнь зурул 1-ннийн, Дагъусттан Республикалул Культуралул министерствалул, Магьирлугърал департаментрал ва Дагъусттаннал ПаччахIлугърал Ссихьрал театрданул сакиншиндарайну. Цала спектакллу ккаккан бан тIий бур БРИКС-рал билаятирттал ссихьрал театрдал. Фестивальданул лагрулий хьун тIий дусса дур меценатшиврул, ихIсандалул, спонсоршиврул, бизнесрал, экономическийсса культуралул суаллу ххал бигьлагьисса форум. Ва фестивальданул Дагъусттаннан кабакьу бан тIий бусса бур муний гьуртту хъана­хъисса билаятирттащал магьирлугърайнусса ва экономикалийну­сса дахIавуртту цIакь дан.

Дунияллул халкьуннал дянив­сса театрал форумрая бувсунни Тимур МахIаммадовлул. Форум хьун тIий дусса дур ялун нанисса шинал октябрь-ноябрь зурдардий. Форумрал мурад бур театрал магьирлугърал ишккаккултрал дянив пишакаршиврул ва творчествалул арарду цIакь даву. Форумрай гьур­тту хьун Дагъусттаннайн бучIан тIий бусса бур Аьрасатнал, СНГ-лул ва кьатIаллил билаятирттал хьхьичIунсса театрал ишкка­ккулт. Форумрал лагрулий ккаккан бан тIий бусса бур классикалул ва ттизаманнул драматургиялул произведениярттаясса спектакллу, бан тIий бусса бур хьхьичIунсса театрал ишккаккулт гьурттусса «мастер-классру», «ккуркки столлу».
Мурад ХIажиевлул бувсунни Театрданул шинан хас дурсса давурттавух гьуртту хьун тIий бушиву районнал Магьирлугърал къатрачIасса халкьуннал театрдугу. Республикалул театрдугу занан тIий бушиву щархъайх пландалий­сса гастроллай ва «Мастера сцены – жителям Дагестана» проектращал. Театрданул шинан хас дур­сса давурттавун кIункIу бан дакIний бу­сса бур жагьилталгу. «Культура — детям Дагестана» проектрал лагрулий дуклаки оьрчIан сакин бан тIий бусса бур МахIачкъалалив театрдавунсса аьрххирду.

Мавлет Тулпаровлул кIицI лав­гунни жула билаятрай па­ччахI­­лугърал чулуха хъунна­сса къулагъас душиву театрдах. ПаччахI­лугърал харж-хуржрай зий бушиву паччахIлугърал 650 театр, миннувух мюрщисса миллатирттал театрдугу.
Театрданул шинал лапра чялиш дуккан тIий дусса дур «Большие гастроли» Федерал Программалул лагрулийсса чIаххувсса республикарттал ва шагьрурдал театрдал кувннал кувнначIансса гастроллу. Ва проектрал лагрулий Да­гъусттаннайн спектакллащал бучIан тIий бусса бур Москавлив Щукиннул театрал училищелий дуклаки­сса дагъусттаннал студентътал. Министрнал бусласимунийн бувну, ми лайкьсса даражалий гьуртту хьуну бур ттигъанну МахIачкъалалив хьусса Оьрус театрдал фестивальданий.
-Театрданул шинал жула хьхьичI буссар чIявусса мурадру. Умуд бур театрдал коллективрдал хIарачатрацIух, журналистуралгу кабакьаврицIух жула республикалий Театрданул шин лайкьну тIайла дукканссар тIисса, — увкунни Зарема Буттаевал.

Лажин хIадур дурссар
Зулайхат Тахакьаевал