КIива цIусса завод

Декабрьданул 18-нний ДР-лул ХIукуматрал Председательнал хъиривчу – ДР-лул шяраваллил хозяйствалул ва бакIлахъиялул министр Аьвдулмуслим Аьвдулмуслимовлул дунни региондалий ппиринж бугьаврил масъаларттал хIакъиравусса батIаву.
БатIаву хьунни Къизлардай. Вице-премьернал бувсунни Къизлардал райондалий тIивтIуну бушиву ппиринж занакьулу бай­сса кIива завод – АО «Кизлярагрокомплекс» ва СПК «Риск». Мунал тIимунийну, цIанасса ппурттуву жучIава ппиринж бугьлай бур сайки 18 азарда гектарданий. ХIадур дуллай бур республикалий ппиринж ххяххан баврин хасъсса программа, му хъин чулий ккарккун дур хIукуматралгу, республикалул каялувчиналгу. Му хIадур хьуну махъ му программалущал кIул бан — тIий бур циняв.

Дагъусттаннай ппиринж бугьаврил хIакъираву ихтилат бунни министерствалул ххяххияр­тталсса байсса управлениялул хъунама АхIмад Расуловлул. Мунал тIимунийну, махъсса 10 шинал мутталий республикалий ппиринж бугьайсса хъуру гьарза дан бювхъуну бур шамлийну, гьашину ларсун дур 86,9 азарда тонна ппиринжрал. Ялунсса шиннардий ппиринж бугьлантIий бур 25 азарда гектарданий.

БатIаврий ихтилатру бунни мукунма «Минмелиоводхоз РД» ФГУП-рал, «Дагагроснаб» АО-лул каялувчитурал, Къизлардал райондалул администрациялул вакилтурал, ппиринж бугьайсса хозяйстварттал бакIчитурал.

ХIадур бувссар
ХI. Аьдиловлул