[dropcap]В[/dropcap]ай гьантрай ЦIуссалакрал райондалий хьунни халкьуннал шаэр ва балайчи Ккурккуллал Щазан 150 шин шаврин хас дурсса нукIузаманнул лакку балайрдал республикалул фестиваль.
Фестиваль хIадур дурну дия ДР-лул Культуралул министерствалул ва Республикалул Халкьуннал творчествалул къатлул ЦIуссалакрал райондалул администрациялущал ва Культуралул управлениялущал цачIу.
Андриана Аьбдуллаева
Щазал оьрмулия ва творчествалия бусласисса ихтилатру бунни ЦIуссалакрал райондалул администрациялул бакIчинал кумагчи Аьвдурашид Буттаевлул, Ккурккуллал Щазаясса лу итабакьин кумаг бувсса шаэр, ТтурчIиял шяравасса Даудов ХIасанхIусайннул.
Щазал творчествалул агьаммур теману хъанай дур эшкьи-ччаврил тема: бакIуйн къадурксса эшкьи, хъамитайпалул цинма талихI тIалав баву.
Ванил балайрдава аьч хъанай дур ччаву хьусса инсаннал сипат:
Эшкьи къахьун ва ттул дакI,
Муххай дирхь чаннан духрав?
Чих къабурган ттул яру,
НякI чIутIул ккулла бухрав?
Щазал оьрму хъинну захIматсса бивкIшиву чIалай бур ванил балайрдава.
Щаза бивкIун бур ляличIисса чIунил ва такьвалул заллу, усттарну рищайсса диркIун дур ччергъилу. Гъази-Гъумук хъатIай-мажлисирттай Щазал балай тIутIисса чIумал, Хъун-неххал тия чулий дирхьусса Хьурттал шяраваллил жямат кьатIув буккайсса бивкIун бур ваних вичIи дишин. Ккурккуллал Щазал яргсса лажин кьариртссар Дагъусттаннал рувхIанийсса культуралул, поэзиялул тарихраву.
Ихтилатру къуртал хьуну махъ хьхьичIазаманнул балайрду увкунни мажлисрай гьуртту хьун бувкIсса Ккуллал, Лакрал, ЦIуссалакрал, Ахъушиял районнал Культуралул управлениялул зузалтрал, А. Къапиевлул цIанийсса Лакрал театрданул артистурал. Цила балай щаллу бувну махъ Дагъусттаннал халкьуннал артистка Саният Рамазановал бувсунни Ккурккуллал Щазал рольданул тIивтIушиву цинма театрданувунсса ххуллу.
— Таний на дуклай буссияв Культуралул училищалуву. Дагъусттаннал халкьуннал шаэр Мирза Давыдовлул чивчусса «Ккурккуллал Щаза» пьесса бишин, рольлу дугьансса инсантурах луглай бия. АрхIал дуклакисса душнил бувцунна на минначIан. На ккаккайхтува, вана жунма Щаза куну, мунил роль най дуна ттуйн тапшур дурна. Вана укун театрданувун бучIаннинма дургьуссар на цалчинсса роль. Лакрал, Ккуллал, ЦIуссалакрал районнайх лавгссар жул самодеятельностьрал театр му пьеса ккаккан буллай, ЦIуссалакрал райондалийн лавгссияв кIинттул. ТачIав хъамакъабитай, машина марххалттанивун кьувтIуну, та къуч буллай бивкIсса куц жува. Щазал роль дургьуния мукьах ттувун хъунмасса гъира-гьавас багьуна театрдануву зун. Гьанжилив Филармониялул залдануву ккаккан бувсса чIумал «Ккурккуллал Щаза», Казбек Мазаевлул бувсун бия Лакрал театрданул директор Валерий Апанниевлухь ттуяту. Театрдануву зун ччай бувкIсса чIумал, Валерий Апанниевлл бувсуна ттуяту бавшиву. Ца зурувату цIунилгу гастроллайн лавгсса чIумал, на дакIний ливчIсса тамашачитал Щаза бувкIун бур тIий буслай бия кувннахь кув. ТIааьнсса асардайну дакIний лирчIунни ттун цалчинсса роль, — бувсунни Саниятлул.
Мажлис чIюлу бунни ДР-лул лайкь хьусса артист Арслан Шахмандаровлул балайрдал, ва Апанни КьурбанмахIаммадовлул цIанийсса «Эдельвейс» хореографиялул ансамбльданул ккаккан дурсса къавтIавурттал.
