[dropcap]М[/dropcap]ахъсса шиннардий Дагъусттаннал Виваллил иширттал министерстволий аьдат­равун дагьну дур Донецкаллал ва Луганскаллал республикалийсса цала колле­гахъал оьрчIан цIушинал бахшишру гьан даву.

АлхIаткьини хьусса бахшишру тIайла дуклакисса акциялий гьуртту хьунни Да­гъусттаннал виваллил иширттал министр, полициялул генерал-лейтенант Аьвдурашид МахIаммадов, ванал хъиривчу, личIи-личIисса подразделениярттал зузалт, МВД-лул Жяматийсса советрал вакилтал. Министрнал бувсунни ва акциялул сиптачитал Дагъусттаннал МВД-лул Ветерантурал совет хьушиву.

Министерствалул зузалт цинявппа рязину гьуртту хьунни ихIсандалул акциялий. Утти ва ххаллилсса даву аьдатравун дагьну дуссар жул министерстволий. Махъсса цаппара шиннардил дянив жу тIайла дуккарду гуманитар груз Луганскалийн, Донецкалийн ва Кримрайн. Хъунма машина бувцIусса ЦIусса шинацIунсса бахшиширттал ххари банссар уссушиврийсса республикарттайсса жул коллегахъал оьрчIру, — увкунни Аьвдурашид Ма­хIаммадовлул.

Азарда бахшиш дусса хъунма машина шадлугърал даражалий тIайла був­ккунни Виваллил иширттал министерствалул къатрачIату. Умуд бур нахIу-нацIулул бувцIусса кьуцурттал ххари банссар асар хъанахъисса оьрчIру тIисса.