[dropcap]Н[/dropcap]оябрьданул 28-нний журналистътуращал хьунаавкьунни республикалул коммунал хозяйствалул хъунама инспектор Аьли Жабраилов. Мунал бувсунни инспекциялул гьашину дурсса давурттал хIасиллая.

ХIасан Аьдилов
Мунал тIимунийну, гьашину май-ноябрь зурдардий, кIинтнил чIумуйн хIадур шаву ххал дигьаву мурадрай, Инспекциялул дурну дур 1107 хъирив лаяву. Миннувату ляркъуну дур даврил кьяйдарду лиян дуллалисса 2848 диялдакъашиву. Миннувух бур законнал тIалавшиннардацIун бакъакьлакьисса кIанттурду, коммунал хIаллихшинну щаллу даврил кьяйда-кьанун лиян дуллалисса ишру. Хъирив лаявур­ттал хIасиллан хасну сукку дур­ссар административ аьдлу-низам лиян даврил хIакъиравусса 140 дело, дирхьуссар 1 млн. ва 99 азарда къурушрансса аькIри. Ялун личин дурсса диялда­къашивуртту духлаган даврил хIакъираву чирчуссар 1387 мас­лихIатшин.

Аьли Жабраиловлул бусаврийну, гьашину ноябрьданул 15-нний Инспекциялийн буллуну бур 4052 чIявуквартирартту бусса къатри кIинттулнин хIадурну бушиврул хIакъиравусса паспорт­ру. Цаппара шагьрурдай циняв къатри хIадурну бакъая. Масалдаран, паспортру къабуллу­ссар МахIачкъалаллал 5 къатлун, Кас­пийскаллал 53 къатлун ва мукунма цаймигу.
Инспекциялул каялувчинал журналистътурахь бувсунни идара хьхьугу-кьинигу зий бушиву, ччимур чIумал оьвчин бюхъайшиву ва телефондалий 63-09-37 ЖКХ-лул чулухасса захIматшивурттал хIакъираву.
«Ноябрьданул 10-нния махъсса ппурттуву Госжилинспекциялийн оьвкунни так къатравун гъилишиву къананаврил хIакъираву 120 инсаннал. Ми лабизавурттал хъирив бивзун, гъилишиву дузал дурссар», — увкунни Аьли Жабраиловлул.
Пресс-конференциялул хIасиллу дуллай, ДР-лул ГЖИ-лул каялувчинал бувсунни гьашину ЖКХ-лул хIаллихшинну агьалинан дукIунияр ххуйну дуллай бушиву ва давуртту цалла низамрайн дурцуну душиву.