Буссия учкъула, уттирив бакъая

Ссухъиящиял школалул къатри вай гьантрай

ОьрчIал багъ, учкъула, нитти-буттал дянивсса шинну… Вайнна вай чIуннал бизлай бур инсаннал оьрмулул гьану. Ва гьану цукун бивзрив, ялувсса «къатригу» хъанай дур мукуннасса.
Жува кIулшиву дулай кIан­ттурдайн «элмулул къатри» учару.


Ялагу бур жула ца ссигъасса учала, оьрму бавккусса ххуллийх лавгун бур тIисса. Амма жунма кIулли гьарца каснал цала оьр­мулул ххуллу язи бугьаву цала биялалийну хъанахъишиву.
Ца кьини ттула ца мурадирай лавгссияв Ссухъиящиял шяравун. Амма цакьнива ттунма сагъну ккаккайсса, оьрчIал чIурдал бувцIуну ххал шайсса Ссухъиящиял шяраваллил школалул къатри ххал шайхту, дакIнил макьу хъинну зия хьуна. МахIатталшиву, ттун учинсса махъгума ляхълай ба­къар. Школалул магъи зерххуну, чIавахьултту, нузру дурккун, полданий царагу тахта къадиртун цавай чIиртту ливчIун бия. Щилли ва даву дурсса?

Гьай-гьай, цала Ссухъиящиял инсантуралли дурсса. Яртал, вай къатравархха байбивхьусса ва шяраваллил чIявуми инсантурал кIулшивручIансса ххуллу. Ва школа бувну бивкIссар 1961-ку шинал. Ганиннин, 1938-ку шинал шяраву школа тIивтIуния шинмай, учкъула цува заллусса инсаннал къатраву бивкIссар. Утти махъ, 2015-ку шинал, оьрчIру чансса бур тIий, Ккуллал райондалул администрациялул лавкьуна ва школа.

Арх бакъа ккурчIав щябивкI­сса инсантурахьхьунгу на буллуссия суал: «Ва щил дурсса давур?», — кунуча, ва ца нава ссал-унугу тахсир уллалисса кунма: «Ина щил унугу гьан увссара вай къатрал суратру рищун», — куна. «На ттула нава гьан увунна» тIисса мукъурттийнгу цучIав вих къавхьуна. Щялмахъ къахьун, ттун ца-кIира нюжмардул хьхьичI бавуна кIа учкъулалул «хавар». Ца-ца чIумал биялалул, хIукмулул заллухъру жу, журналистал, ишру ури буллай бур тIун бикIай. Гьич, на цичIав «ури» буллай акъара, ккарксса суратра ккаккан дуллалисса.