Къанясив хьуссар ттун уссурвал Хачилаевхъащал гъанну к!ул хьун, щябикIан-бизан. Тай миллатрал ишру бачин бан чялиш бувксса чIумал на бияв студентка.
Тайннал так ца лакрал миллатрал бакъасса, щала Дагьусттаннал оьрмулуву бугьлай бивкIсса кIану цуксса агьамсса бивкIссарив ва тайннал личностьрал лагру цуксса кIусса диркIссарив бувчIайсса бакьахьунссияв на тани, лакрал миллатрал гьунттийсса кьинилул ялув бакIцIуцIавугу хIакьину куннасса дакъахьунссия ттул.
Ттула дакI ва пикрирду миллатрал ялун бучIантIимуния ябуцан бан къашайсса даврийнгу бакIрайн багьну, аькьлу-кIулшилул биял хьусса ябитаврийну махъунмай буруглан бивкIукун, уссурвал Хачилавхъал заманнай лакрал миллатрай цукунсса аргъ диркIссарив дакIнийн багьлай (цамур бакъасса, лакрал жагьилтал бакIру гьаз дурну, хъачIру паргалну, хъуртти ганзну бикIайва), бувчIлай бур уссурвал Хачилаевхъул лакрал миллатрал хъаруну бивкIшиву.
[dropcap]Ч[/dropcap]чя-ччяни баяйхха ттигу: «БивкIссания уссурвал Хачилаевхъул дунияллий лакрал бавцIуну бикIантIиссия,» — тIисса хIайп тутIавуртту.
МахIаммад Хачилаев дунияллия лавгсса гьантрай му ттуна дакIнийн утан мунащал билаятрал хьхьичIунсса журналистурал дурсса интервьюрду ккалай, мукIру хьура Лакрал миллатрал цIаний аьпабиву бунияла кIиххяуккангу, цIаравун ххяхханну хIадурну ивкIшиву. Сурхай-ханнал пикри-дакI дусса ивкIшиву.
Ялу-ялун асар хъанай бур цуксса мискин хьуссарив, цуксса гъаривну ливчIссарив лакрал миллат уссурвал Хачилаевхъул дунияллия батIул шаврищал. Мунияту миннал бивкIу ялу-ялун бюхлай бур.
Хачилаевхьул кунмасса чиваркI дунияллийн буккайссар ттуршра-кIиттуршра шинай цал. Гьай-гьай, тай жула дакIурдива тачIав къабуккантIиссар. Амма тайннал аьпа буруччавуну хьунссар лакрал жагьилтал миллатрал цIа-кьини гьаз данну къуццу тIурча. Гьай-балики, букканхьуви ттигу лакрал дянива уссурвал Хачилаевхъал пикри-дакI дусса жагьилтал.
Зулайхат Тахакьаева.
