КIулшиву хьхьичIуннай даврил ххуллий

Каспийск шагьрулий Республикалул кIулшиву хьхьичIуннай даврил центрданий хьунни Дагъусттаннал кIулшиву дулаву хьхьичIуннай даврил стратегия ххал дигьлагьисса семинар-совещание. Му сакин дурну дур Дагъусттаннал педагогтурал ассоциациялул ДР-лул КIулшиву дулаврил ва элмулул министерствалул кабакьаврийну Дагъусттаннал кIулшиву хьхьичIуннай даврил институтращал цачIуну.


Зулайхат Тахакьаева
Гьуртту хьунни муний ххю­ттуршунния ливчусса педагогтал.
«ХIакьину жунма багьлай бур педагогтурах вичIидишин, миннал буруккинтту бувчIин, муних бурувгун дачин дан КIулшиву дулаврил ва элмулул министерствалул даву. Жула хьхьичI бу­ссар цачIу чулийн буккан буллансса чIявусса мурадру,» — увкунни кIулшиву дулаврил ва элмулул министр Уммупазил Оьма­ровал.

Ванил кIицI лавгунни педагогнал даву бигьа хьуншиврул, ча­гъардал даву чан даншиврул, оьрчIру ттизаманнул кьяйдардай зузи баншиврул, чарабакъа багьлай бушиву кIулшиву дулаврил программартту цIудуккан дан ва цIусса технологияртту щурущи дан.
Министрнал балжину бувсунни педагогтурал аттестация давриву хьун дурсса дахханашиннардаятугу.
«Аттестациялул комиссия цIу баврицIун мархлуцIакул да­ххана дурссар мунил даву. Жун аьркинсса аттестациялул комиссиялул даву чанна давур ва жува кьамул бувсса хIукмурду зун гьарцаннан бувчIавур,» — увкунни ванил.
КIулшиву дулаврил хьхьи­чIун­сса зузалтран дуллунни наградартту. Миннавух бия «Учитель-дефектолог – 2018» тIисса щалагу Аьрасатнал дефектологтурал цалчинсса конкурсрай финалданийн бувксса Разият Ададаевагу.

Дагъусттаннал педагогтурал ассоциация сакин дурссар 2017 шинал, учительтурал пишакаршиву ларай даврил шартIру дузал дан­сса мурадрай. Ассоциациялувун бухлай бур ацIния мяйра гьанусса дарс дихьлахьисса шаназаруннийн бивсса учительтал. Ассоциация зий бур хьхьичIунсса
педагогтурал опыт ппив баврил, учительтуран­сса семинарду, лекциярду, форумру, фестиваллу, олимпиадартту ва конкурсру сакин баврил цIаний.

Дуклаки оьрчIал аттестациялул хIасиллая ва лагьсса ккаккияртту дусса школарттай кIулшиву дулаврил даража лавай бан дурсса даврия бувсунни кIулшиву дулаврил министрнал цалчинма хъиривчу Ширали Аьлиевлул ва Дагъусттаннал кIулшиву дулаву хьхьичIуннай даврил институтрал ректорнал буржру чIумуйну биттур буллалисса ХIамзат Жамалуттиновлул.
Муния махъ семинарданул даву дарчIуну дия ацIния мяйра дарсирал секциярттайх. Микку дарсирдал учительтурал бунни мастер-классру.

«ХIакьинусса семинар сакин бувну буссия педагогтурал дянив уртакьшиву цIакь дансса мурадрай. Муний гьуртту хьу­сса цумацагу учительнаща, методистнаща бювхъуссар бусан цала даврил кьяйдардая, цанма къакIулмур цайминная ла­хьхьин,» — увкунни Республикалул кIулшиву дулаврил центрданул каялувчи, Дагъусттаннал педагогтурал ассоциациялул хъунмур Анжела Байрамбековал.

Республикалул кIулшиву дулаву хьхьичIуннай даврил хьхьичIххуттайсса мурадру ххал бигьиншиврул, Уммупазил Оьма­ровал каялувшиндаралу сакин бувну бия шагьрурдал ва районнал кIулшиву дулаврил управлениярттал каялувчитуращалсса «ккуркки стол».

Микку ххал бивгьунни ду­ккаврил идарарттал мюхчаншиву дуруччаврийн, кIинтнийнсса хIадуршиндарайн, школарттал материал-техническая база ххуй баврийн, луттирдал дузал баврийн, гъилисса дукралул щаллушиндарайн, «медалистал» ххал баврийн ва учительтуран ка-кумаг баврийн багьайсса суаллу.

Семинар-совещаниялул хIа­силлу дурну махъ, педагогтурал барчаллагь увкунни Уммупазил Оьмаровахь учительтурал буруккинттах дуллалисса къула­гъасрахлу ва укунсса журалул мероприятияртту сакин дуллалаврихлу.