Витаминнах ургъил бувара
Пагьриз (диета) дургьусса чIумалгу канакияра чурххан хайр бумур ва витаминну.
Витамин В. Ва витамин чара бакъа аьркинссар диета дургьунигу. Мунил инсаннайсса май дассан дан кумаг байссар, углеводру ххуйну лялиян байссар.
Витамин В буссар нехълул дукралуву, аьнакIул кIяла дикIуву, салатраву (чIапIаву), нувщуву, ттиликIраву, кIукIлусса нисираву, сельдь балугъраву.
Витамин Д. Цинявппа клеткардан аьркинсса «солнечный» витаминни ва. Ва витамин бакъахьурча, май даслан къадикIайссар. Мунияту витамин Д биял хъанай бакъахьурча, инсан учсса икIайссар. Ва буссар балугърал аьгъушивруву, лагавриву, дарцIу нисираву, шампиньон ттуккулнисираву, ккунукрал хъахъулуву.
Калий. Ванил ххишалами щин дуккан дайссар чурххава. Калий буссар помидордануву, соялуву, къайсилуву (сухофрукты), форель балугъраву, щюлли хъюрувраву, миндальдануву, цIу нувщуву, ахъвазандалуву.
Витамин С. Ва витаминдалул бурчу бювчIан байссар. Гьассар гьантлун 1 г. ва витаминдалул. Витамин С буссар брокколи-каландалуву, хъасараву, каландалуву, шпинатраву, кивилуву, нацIу мамашраву, щаххуллул ахъулссаннуву, цитрусрал ахъулссаннуву (апельсин, лимон, мандарин).
Кальций минерал. Кальций буссар аьгъу дакъасса накIливу, нисираву, аьгъу дакъасса хIуру нисираву (творог), йогуртраву, ккунукирттаву, гьивхьхьуву.
Ваниягу кIулну хъинссар
Иммунитетрал дустал:
— Чимус, лаччи, хрен, горчица – вайннувусса фитонцидру чялишну талан бикIайссар вирусирттащал, микробирттащал. Мунийну иммунитет гьаз шайссар, жувагу бурувччуну бикIайссару гьарцагу оьсса къашайшаврия.
— КьурчIинакIлил дукра – тартнакI (кефир), йогурт. Вай мудан ишла дулларча, ххюттукалул микрофлора ххуй шайссар, иммунитет гьаз шайссар.
МарцIсса гьавалийхсса, бургъилухсса заназин. Бургъил кумаграйну инсаннал бурчуву цачIун шайссар витамин Д, ттаркI, ккарччив, иммунитет цIакь дайсса.
Иммунитетрал душмантал:
— Полуфабрикатру: миву дикIайссар инсаннан зарал бусса чIярусса затру.
— Кофеин. Ва буссар тунтсса лухIи чяйлуву, кофелуву, кока-колалуву. ЧIяруну хIачIларча, иммунитет лагь шайссар.
— Качар ва хIан. ХIан хIачIияра чан-чанну, цила кьаралданий.
ЦIуллуну битаннав.
ХIадур бувссар
Т. ХIажиевал