Аьрасатнал халкьуннал Цашиврул кьини щалагу билаятрай баян бувну бия «Магьирлугърал хьхьу» тIисса акция. Лайкьсса даражалий хьунни му Апанни Къапиевлул цIанийсса Лакрал музыкалул ва драмалул театрданувугу, му хьунни мюрщултрансса унгу-унгусса байранну.
Театрданул жанахIраву хъамал хьунабакьлай бия магьлул персонажтурал яннардавусса актертал. ОьрчIру, ххарилгу литIавай, миннащал суратру ришлай бия. ОьрчIащал бунни нетIакуртту дан лахьхьин буллалисса «Мастер-класс».
Зулайхат Тахакьаева
[dropcap]М[/dropcap]уния махъ ккаккан бунни Казбек Мазаевлул чивчусса «Къучагъсса барзукка» тIисса магьлийнусса спектакль. Ва магьлул лакку мазрайсса премьера хьуссар ацIниясса шиннардил хьхьичI. Муния шинмай магьа оьрус мазрай ккаккан буллай бур оьрчIал багъирдаву, интернатирттай, реабилитациялул центрдай. Ва базилухгу магьа бивхьунни лакку мазрай.
ЩяикIансса кIану бакъа бувцIуну бия зал. Гъирарай буруглай бия мюрщулт сахIналий хъанахъимуних. Асар хъанай дия мюрщултран магьлувусса хъиншивугу, оьшивугу, дусшивугу. Ахирданий дусшиву ва хъиншиву ххув хьувкун, магьлуву гьурттусса артистурал (ХIажиаьли ХIажиаьлиев, Жинасат ДинмахIаммадова, Халисат Батырбекова, ПатIимат Давыдова, Ибрагьим Рабаданов, Зина Чавтараева, Жаннат Гянжиева) оьрчIру, цащалва сахIналийн лахъан бувну, къавтIутIи бувуна.
[dropcap]Ч[/dropcap]Iава тамашачитуращал бувкIсса хъуниминнангу хIадур дурну дия хъурмурчIин халкьуннал балайрдая сакин дурсса ххаллилсса концерт. Тамашачиталгу цавай залданува, цавайгу артистурал цащала сахIналийн буккан бувну, балайрду тIий бия. Цайминнуха къалархьхьуну, ца тIааьнсса, аьчухсса, мяйжаннугу халкь цачIун буллалисса байран дия га хьхьуну Лакрал театрдануву.
