ДР-лул миллатирттал иширттал министерствалул щурущи бувсса «Цукун ялапар хъанай ура чIаххучу?» тIисса проектрал лагрулий ххуллункьини ШавкIуллал шяраву хьунни хъуннасса байран.
Мунил яла бусравми хъамалгу бия чIаххувсса Ахъушиял райондалул Гулаттимащиял шяраватусса делегация.
Зулайхат Тахакьаева
Гьуртту хьунни муний ДР-лул миллатирттал иширттал министрнал буржру биттур буллалисса Татьяна Гамалей, Лакрал райондалул бакIчи Юсуп МахIаммадов, Ахъушиял райондалул бакIчи АхIмад МахIарамов, ДР-лул Жяматийсса Палаталул хъунама АьбдулхIалин Мачаев, ванал хъиривчу Ссапар Аьбдуллаев ва чIявусса цаймигу.
Байран дуван хьхьичI проектрал лагрулий хьуну дур ШавкIуллал ва Гулаттимащиял шяраваллал куннал куннащалсса хьунабакьавуртту. Дусшиврул ва чIаххулшиврул аьдатирттан хас дурсса суратирттал выставкарду, концертру, экскурсияртту, жяматийсса ккураннал вакилтуращалсса хьунабакьавуртту. Ттигъанну ШавкIуллал школалул дуклаки оьрчIру лавгссар Гулаттиял школалийн хъамалу.
[dropcap]Ч[/dropcap]Iаххул ва байрандалул бусравсса хъамал хьунабавкьунни цIу-ччатIущал ва зюннав дачIулущал.
Хъунмасса Буттал кIанттул цIанийсса дяъвилия зана къавхьуминнал гьайкалданучIа дирхьунни тIутIив. Муния махъ хьунни ватандалухлу жанну дуллусса вирттаврал аьпалун хас дурсса митинг.
ШавкIуллал школалул аьрщарай хъамаллурал бувгьунни Лакрал ва Ахъушиял шяраваллал дянивсса дусшиврун цIа кусса мурхьру.
Школалул жанахIраву дия дуклаки оьрчIал канил давурттал ккаккия «Цукун ялапар хъанай ура чIаххучу?» тIисса темалун хас дурсса. КIирагу шяраваллал дуклаки оьрчIал дянив хьунни спортрал тIуркIурдал бяс-ччал.
Школалий хьунни «ЧIаххучу чIаххучунан чул бищунсса ттарцIри» тIисса темалун хас бувсса «ккуркки стол». Микку Татьяна Гамалейл кIицI лавгунни проектрал мурад хъанахъишиву республикалул миллатирттал дянив дусшиву ва магьирлугърайнусса дахIаву цIакь даву, ми куннал аьдатирттащал ку кIул баву, терроризмалул ва экстремизмалул пикрирду ппив къахьунсса профилактика даву. Проект зий хьуну дусса дур кIира шин.
ЦIубутIуй проект зий бивкIун бур ца райондалул вив, чIаххувсса шяраваллал дянив. Яла пикри хьуну бур проект районнал дянив щурущи бан. Дайдихьу дурну дур Лакрал ва Ахъушиял районная. Министрнал бувсунни гихунмай ва проект регионнал дянив бансса пикрилий бушиву. Мунил ялув ихтилатру хьуну бусса бур Чачаннал республикалул, Краснодардал ва Ставрополлал крайрдал министерстварттащал. «Бюхъай яла проект дунияллул халкьуннал дянивсса лагрулийнгу буккан, жула чIаххувсса Азирбижаннал ва Гуржиял республикарттащал бан,» — увкунни министрнал.
«Жула ппухълунная жуйнна дирсса аьдатру духларгун лякъай. Хъамалшиврул, чIаххулшиврул аьдатру жура цIудуккан дарча, махъзуманив миллатирттал дянивсса сукку хъанахъисса къалмакъаллу дайщун дантIиссар,» — ххи бунни ванил.
Юсуп МахIаммадовлул бувсунни ШавкIуллал шяраваллил тарихрая, мичча бувксса цIанихсса инсантурая, Гулаттимащи шяраваллищалсса арардая.
АхIмад МахIарамовлул бувсунни «Как живешь, сосед?» тIисса ДР-лул миллатирттал иширттал министерствалул проектрал лагрулий Ахъушиял райондалул Гъуниннал, Дахадаевуллал ва Къаякантуллал районнащал цачIуну бувсса «КIура баянну мархрачIан» тIисса проектрая. Ванал мукунма бувсунни министерствалущал цачIуну Волгоград шагьрулий Мамаев Кургандалий дацIан дуршиву Сталинградрахлу талай жанну дуллусса дагъусттанлувтурансса гьайкал.
[dropcap]Ш[/dropcap]авкIуллал ва Тебеклимащи шяраваллал администрациярттал бакIчитурал: Рамазан Асабовлул ва Мажид Мажидовлул бувсунни жяматрал каширдацIух дурсса давурттая. Тебеклимащилив ххуллийх асфальт бувтIуну бур, ШавкIрав бяргу марцI бувну, хIачIайсса щинал турбарду бувцуну бур.
Лакрал райондалул бакIчинал хъиривчу Ансар Къажлаевлул бувсунни Лаккуйсса ва къутаннайсса шяраваллал жяматирттащал дурсса терроризмалийн къаршисса давурттая. Хъун хъанахъисса ник ватан ххирану тарбия даврия бувсунни ШавкIуллал школалул директор Асли Ккакваевал.
«Ккуркки столданул» даврил жям дуллай, АьвдулхIалин Мачаевлул кIицI лавгунни ва журалул давурттал агьамшиву. Проектрал сакиншинначитурахь барчаллагь увкунни дусшиврул ва чIаххулшиврул байрандалухлу. Бувсунни «ккуркки столданий» сукку бувсса кIирагу райондалийн багьайсса суаллу Жяматийсса Палаталул къулагъасралун ласунтIишиву.
Байрандалий ца яла яргсса иш хьунни, лакрал хьхьичIарасса хъатIул аьдат ккаккан даву.
Цила бикIайкунсса хъатIуй бусса кунмасса асар дакIний ливчIунни, тIий бия Татьяна Гамалей.
Муния махъ ШавкIуллал клубраву ккаккан дурунни кIирагу райондалул магьирлугърал зузалтрал концерт. Дайдирхьуна концерт Лакрал гимн учаврия. Шиккува кIицI бан, хъинну ххуй дирзун дия Татьяна Гамалейн лакрал гимнгу, хъатIул балайрдугу. «Укун дакIнивун гьавас бутанну балайрду тIий ттун ттинин чувчIав хьунакъабавкьуссар», — тIий чивчуну бия мунил байрандалиясса цила пикрирду фейсбукраву.
Байран сакин дан чIарав бавцIусса кIирагу райондалул администрациярттал зузалтран ва спортрал тIуркIурдай ххув хьусса дуклаки оьрчIан миллатирттал иширттал министерствалул чулуха буллунни барчаллагьрал чагъарду ва ХIурматрал грамотартту.
