[dropcap]Л[/dropcap]авгсса заманалул бардултсса, ккалли бансса ишру бартбигьлай бивкIсса инсантал ялу-ялун чан хъанай бур. Мунияту бусанманащал цуксса бюхълай бурив, муксса ччяни хьунабакьин багьлан бикIай.
Уттигъанну на хьунаавкьура ца мукунсса хъуначунащал. Му хъуначугу ЦIуйшиял шяравасса, чIярусса шиннардий Ккуллал райондалий жаваблувсса къуллугъирттай зий ивкIсса Ярагъи МахIаммадоври. КIибачIлай ура зущалгу мунал бувсмур.
— На га чIумал зий уссияв Ккуллал райондалул Исполкомрал председательну. Га шин цурдагу Дагъусттаннай автономия баян бувну 50 шин хъанахъисса чIун дия. Га шадлугърайн оьвкуну бия АхIмад-Хан Султаннуйнгу. Ттущал Ккуллал райондалия буссия 1-ма секретарь Аьвдулжалал ХIусманов ва Ккуллал колхозрал председатель МахIаммад-ХIажи ХIажиев. Жу ливккун буссияв «Каспий» патирдануву.
АхIмад-Хан Султан Дагъусттаннай уссаксса хIаллай яхъанай ия МахIачкъалалив цала гъанссанначIа. УчIайва га жучIан патирданувунгу. Цал мукун увкIсса чIумал, жу ганахь тавакъю бувссия, ачу жущал Лаккуйн куну. Жун ччай бия га Ккуллал райондалийсса циняв шяраваллал агьалинащал кIул уван. Амма ганал: «Цаппара шиннардива ттун 55 шин хьунтIиссар. Му чIумал на ттула давугу кьадитантIиссар.
Яла на учIанна зун ччинийн. Бюхъайссар зу ттуяту бизаргума хьун», — куна. Яла ялунгу ххи бувна: «Ца «гамуш» буссар ттух ялугьлай, махь бансса. Тагу махь бувну, учIанна», — куну. Яни му бия цIусса самолет испытать дан нанисса хавар. Му чIумал ганайн Москавлия телеграммагу дуркIун диркIун дия. Муния махъ тIурча, 1971-ку шинал февральданий АхIмад-Хан Султаннул оьсса хавар бувкIуна. ЛивчIуна ганал ва жул хияллу барткъалавгунма.
Дяъвилул шиннардий кIийла Виричу хьусса инсан уссар 154. Миннава шама уссар Къапкъазнава: Цероев, Баграмян ва АхIмад-Хан Султан. Ттул пикрилий, бучIия цумур-бунугу ца шагьрулун ягу шяраваллин АхIмад-Ханнул цIа дизан. Ваччав дур хIакьинунин яхьуну дяъвилияр махъ ва Лаккуйн увкIсса чIумал авцIусса къатри. КIай къатрайнгу бучIир «шикку авцIуну ивкIссар» тIисса ула лачIун дуван.
Бувсуна Ярагъинал цаймигу затру. Амма ттун хъинну бювххуна ванал АхIмад-Ханнуя бувсмур. Бусав нагу му зухьгу гъирарай. 1-мур ЦIувкIратусса дуклаки душнил, Ванатиева Залинал, цилла сочинениялий бия укунсса махъру чивчуну: «Летчиктал ликъатIайссар, левххунни лагайсса», — куну. Бакъаривла хIакьсса махъру?
