[dropcap]Н[/dropcap]оябрьданул 1-нний ДР-лул Дуккаврил ва элмулул министерствалий хьунни Уммупазил Оьмарова ва республикалул муниципалитетирттал ду­ккаврил управлениярттал каялувчитал гьурттусса хъуннасса батIаву.

З. АьбдурахIманова
Шикку ххал бигьлагьисса хъунмур масъалагу бия «Элект­ронный детский сад» тIисса информациялул система щурущи даврия ва хьунадакьлакьисса захIматшивурттая бусласисса.
Уммупазил Оьмаровал ба­тIаврий кIицI лавгуна «электрон очерданул» давриву чIярусса диялдакъашивур­тту душиву ва му ара цIудуккан дан аьркинну бушиву.

«Сайки гьарца кьини жучIан ва масъалалул хIакъиравусса нитти-буттахъаясса аьрзри бучIай. «Электрон очередь» тIисса зат дур, амма мунил­сса байсса, мунийхчIин зузи­сса садикрал каялувчитал ба­къар. ЦIусса низамрай зун нажагьсса акъа хIадурну ­акъар! Миннал га хьхьичIва кьамул буллай бивкIсса журалий кьамул буллай бур цала садикирттавун оьрчIру. Жу багьай­сса информация буларду прокуратуралийн. Хъирив лаян ччай бур гьарцагу муниципалитетрай, садикирттай хъанахъимунил ци тагьар дурив. Жун цинявннан дурчIлачIисса, гьарнан чIалачIисса сурат дикIаншиврул, ва ишираву цаппара механизмру ххал дигьин ччай бур», — увкунни министрнал.
Садикирттайн багьайсса ма­съала бакъасса, батIаврий мукунма хIасиллу дайсса паччахIлугърал аттестациялиясса ихтилатгу гьаз бувунни.

«ЕГЭ-лул хьхьичI дувай­сса паччахIлугърал аттестаци­ялул давривугу цаппара да­хханашивуртту дан дур. Аттестация дувайсса кIанттурдая тIайла хьуну, микку оьрчIал ялув бавцIусса пишакартурайн бияннин дахханашивур­тту дан багьлай бур», — увкунни У. Оьма­ровал.
Шиккува кIицI лаган, декабрьданул байбихьулий школа къуртал бан нанисса дук­лаки оьрчIал чичинтIиссар ЕГЭ дулун ихтияр ласласи­сса сочинение. Му чичлачи­сса кIанттурдайгу ЕГЭ дулайни куннасса тIалавшиннарду сакин дурну дикIантIиссар.