ЦIу лаган бувара ЦIувкIуллал тарих

ш. 1-мур ЦIувкIул.

1-мур ЦIувкIратусса ХIасаннул арс ХIусайннул ва мунал кулпат Аьишатлул цIу лаган дунни ЦIувкIравсса, 300 оьл ябувайсса бивкIсса оьллал ферма.
Ниттил чагъар

ХIусайннул уссия яхI бу­сса, хъиншиврий цIа дурк­сса буттагу. АцIва оьрчIал ппу. Мунангуя ххирасса яттиха, хъу-лухччинуха хIурмат буллан. Бу­ттал ирсирайхри ХIусайнгу лавг­сса, шяравалугу, ризкьигу ххира хьу­сса. Циняв шагьрурдайх ппив хьуну нанисса ппурттуву шярава ша хIура къабунни ХIусайннул. Вайминнал шагьрурдай бувайни, миннал арснан хъатIигу шяраву бунни. ХIусайннул кIункIу бунни шяравун Шяраваллил кьинилул байранну дуван хъамабивтсса вирттал, хьуссар ЦIувкIуллал кьинигу, бувссар арснан хъатIигу, чIявусса агьали лагма лаган бувну. ХIусайннул ва Аьишатлул арснал талихI бусса оьрму хьуннав, мунал ми оьрчIангу ЦIувкIрав хъатIи бувансса цIуллушиву дулуннав.

ХIасан ва Маржанат ба­къагу, ЦIувкIрав цаймигу бур кулпатру ацI-ацIва оьрчI хъуни бувсса: Бакрил ва Шарипатлул, Муаьбиял ва Гьидаятлул, Пуланхъал ПатIиматлул ва Рамазаннул, МахIаммад-ХIусайннул ва ПатIиматлул. ЧIявуми хъаннил тани арулва-мяйва оьрчI байссия, ттукрай гьивурдугу дурну, гьарахъун къама гьаенгу лагайссия. Мис­киншивугу, захIматшивурттугу дурхIуну, яхI ххину ялапар хъанай бикIайссия. Ттукрай чар­тту, тталлу ххилайя жула ппухъруннал цIувцIучарил къатри дурсса. Ххирасса арсрув, душрув, лажиннича, ядара буттал къатри. КIиккувасса чарицIух, кIиккурасса аьрщарацIух ца къатта бухьурчагу бакьин бувну, магъи диширчан, цIуларгссар къатри, гъинттул виланий инава игьалаганссара.

На хъунмасса барчаллагь учин ччай бура шяравалу ххиранувасса журналистка Рамазанова ПатIиматлухь, ЦIувкIул кусса цIа зумату щяв къадишай, шяраваллил цIа-кьини гьаз дуван чялиш бувкнувасса душ бур. ХIукуматрал, райондалул хъуниминнайн бувккун, хIарачат бувара шяравунсса ххуллу бакьин буван. ХIусайннул арснал хъатIи буван хьхьичI гьантрай шайсса куццуй бакьин бувну бия ххул­лу. Шяравалу ххирасса арсру цаймигу бушиву кIулли. Аьлиханхъал МахIаммадал шяраваллихасса «Илчи» кказитрай бивщусса шеъри ккалай дакI къума ларгун аьтIий бивкIра.

Ца хьуну, цачIун бавтIун, буттал шяраваллил тарих цIулаган буллансса кашигу, цIуллушивугу дулуннав цIувкIуллал вирттаврахьхьун. Кьамул бувара, арсрув, бу­ттал аьрщарах мякьнувасса ттул хханххирава нанисса миннат­рал ххару: ядувара буттал къат­ри, ябувара жулва кIану.

Шарипат Оьмарова,
1-мур ЦIувкIратусса захIматрал ветеран