Хъат хьхьичIун дугьаву – му бигьабукул сянатри

ХьхьичIва ттун цIими шайва, хъат дургьуну, ттула хьхьичIун увксса цумацаннай­гу, «Шярайхуккул чантайлия цучIаввагу урувччуну акъассар» тIисса калимагу дакIнийну. 

Амма шинну наниссаксса ттун бувчIунни му цаппарассаннал цаллара сянат душиву.


Зулайхат Тахакьаева
[dropcap]М[/dropcap]асала, ттун ми чIявуну хьу­­набакьай Лаккуйн нанисса маршруткардачIа. Ца базилух мукунсса хъамитайпалухь щупирнал увкунни: «Вай халкьуннал вин ца-ца къурушраяр ххисса щилчIав къадулунссар. Дугу ца-кIиннал дакъа къадулунссар. Ина гьарца кьини ва кIанттайн бувкIун, ттул маршрутка багу-бавхьуну, шюшаварча, на вин ттуршра къуруш дулаванна. Ххюва-ряхва маршрутка шюшаварча, 500-600 къуруш кьинилун лякъин хьун тIий дур вища», — куну. Сситтуй гъургъугу бувну, хъамитайпа лавгунни.

Цамур ишгу. Каспийскалийн маршруткарду лагайсса ликказандарал даин хьунабакьай, арснал ччарлу баххана бан багьлай бурчакьай, кумаг бара тIисса хъамитайпа. Ца кьини пикри хьунни: «Цими шинни ва кIанттай ва хъамитайпа хьунабакьлай. Ваксса хIаллай ванил арснал ца бази хьунссия, я хъинсса, я оьсса», — тIисса. Мукун увкукун, аьрщарал бювкьун лавгсса кунма, бакъа хьунни.
«Ряхра шинни ва хъамитайпа, жагь шикку, жагь Каспийскаллал автостанциялий ккаклай. Ца цучIавгу мунил къашавай акъассар, — увкунни тинай авцIусса щупирнал. – Лархьхьу тура кьакъаритайссар инсаннал. Жула халкьгу –пайхаммартал, бигьану вих шай», — тIий ур.

Цукунни вих къахьунтIисса, оьрчI-душ бивкIулул ххяппухь бур тIий, цIими чIа тIисса яру вила ­иттав буруглагийни? Ца оьсса кьини бакIрачIан къадуркIун, дугьайссарив урчIвагу базу сагъсса инсаннал цаманал хьхьичIун хъат? Амма дусса дур дунияллий чIатIалтрал сянат.

[dropcap]Ч[/dropcap]IатIалт кIичIирттаву чIяву шайссар тIар, жяматрал ахIвал ялавай багьсса чIумал. ХIакьинурив иш цамур куццуй бур. Цуксса ххуйну жува яхъанай бурув, муксса чIяву хъанай бур жула дянив бигьабукулт. Зун циванни, «дяъвилул мушакъат увмара», «бакIрал сакъатссара» тIий, ягу билет ва документру бавцуннича, ххуллух­сса арцу дула тIий, оьрчI ягу цува «захIматну къашавай» ур тIий, халкьуннахь цIими чIа тIий яхьунгу бюхълай буна. Къашайхха мукунминнай къадагъа дишингу.

[dropcap]Ш[/dropcap]ярайхуккаву ва чIа тIутIаву кьюкьаласса иширан ккаллину бивкIун бур заманнайва. Тарихрал бусавурттайн бувну, Баргълагавал Европанаву шярайхуккаву къадагъалийсса иш бивкIссар. Шярайхбуккултрал хъирив багьлай бивкIссар, ми тахсиркартуран ккалли буллай.

Дянивмур ттуршукулий Англиянаву паччахI Елизаветал дуккан дурссар шярайхбуккултрайн дагьайсса хасъсса закон. Европанаву сакин бувну бивкIссар шярайхбуккулт ва чIатIалт гужрай зузи буллалисса къатри. Ми бивкIссар лавкьусса идарартту — чIатIалтрансса дуснакьру.
Баргъбуккавал билаятирттай тIурча, цамур куццуйсса диркIссар чIатIалтрахсса ябитаву. Цадакьа бачIаву исламрал диндалул кьанунни. Буссар цадакьа чIа учин бучIисса ишру, амма так захIматсса тагьарданува укканнин. Даву хIисаврай, чIа тIутIаву къабучIи буллай бур. Аьрабнал билаятир­ттал уголов кодексирттай кка­ккан бувну бакъар чIа тIутIаврихлу танмихIрайн уцин.

Аьрасатнаву, ххачпараснал аьдатрайн бувну, чIатIалт ккалли буллай бур авдалтуран. Аьлимчу Иван Прыжов «Нищие на Святой Руси» тIисса цала трактатрай чичлай ур: «Мубараксса Аьрасатнаву чIатIалтран ккаллину бивкIссар, цичIавгу къадуллай, Христослул цIаний цIими чIа тIутIими. ХIасул хьуну бивкIссар мукун­сса симбиоз: «ЧIатIала аваданманайну бакIуклакиссар, аваданма чIатIалал дуаьрттал уручлачи­ссар», — тIисса. Мукунсса цIими бушаврийну хIасул бувну бур «пишакар­сса чIатIалт».

Николай I паччахIнал заманнай шярайхбуккулт, тIайлабацIан байсса идарарттай мукьра шинай зузигу бувну, яла тIайла буккайсса бивкIссар Ссивирлив.
Совет заманнай шярайхбуккаву ххал дигьлай бивкIссар «бигьабукултрал сянатну» ва миннаща ца ягу кIира шинай тархъаншиву зе­ххайсса диркIссар, ягу мукссава мутталий зузи байсса бивкIссар хасъсса идарарттай. Хъиннува кIусса танмихI кьувкьуминнаща тархъаншиву зеххайсса диркIссар шанна шинайн дияннин. ЦIана тIурча, миннансса танмихI куклу хьуну бур. ЧIа тIий иривсса инсан, агарда му Аьрасатнавасса акъахьурча, уккан айсса ур билаятрая. Дуснакьрайн ягу Ссивирлив тIайла къабу­ккайсса бур. Ттизаманнул Аьра­сатнаву чIа тIутIаву хъанай дур къатта-къушбакъултрал (бомжтурал) сянатну.

Халкьуннаву ппив хьуну бур, ай, пишакарсса чIатIалт ххуйну яхъанай буссар тIисса пикрирдугу. Ттизаманнул «Остап Бендертуращал» хьунабавкьуминнах вичIи диширча, миннал ца кьини цикссарив азарда къуруш лякъайсса ду­сса дур. Амма аваданталгу миннал дянив бакъасса бур. МахIатталсса иш бакъарив, циксса ляхъларчагу, хъат хьхьичIун дургьуну занайнма бушиву! Масалдаран, ласурча пишакарсса чIатIалт чIявусса билаятру, ккаллиссарив ми авадансса ва тIутIайх бичлачисса билаятир­ттан? Къаккаллиссар! Пишакар­сса чIатIала — оьрмулухунсса шярайхуккур. Ва журалул даврил хасиятгу — пишакарсса азарди.