НахIусса дукра – дарсирдахсса гъира!

[dropcap]Л[/dropcap]аргсса нюжмардий МахIачкъалаллал 13-мур школа-гимназиялий шагьрулул школарттал цIигьуртурал семинар-батIаву хьунни. Шикку ва аралул зузалтран хъинну насихIатсса, оьрчIал цIуллу-сагъшиврун хасъсса, мюнпатсса ихтилатру, маслихIатру хьунни.

З. АьбдурахIманова
[dropcap]С[/dropcap]еминарданул цIубакIрай ва школа-гимназиялул оьрчIал дукра дукайсса залданувух ва дукра дувай кIанайх цIигьуртурансса хъун бакъасса экскурсия бувунни.
МахIачкъалаллал КIулшивур­тту дулаврил управлениялул каялувчи ТIагьир Мансуровлул пишакартал барчагу бувну, кIицI бувунни махъ ппурттуву школарттай оьрчIан бузсса дукра даву низамрайн дурцуну дунугу, ттигу-шилагу СанПинрал цаппара тIалавшиннарду биттур дан дурану душиву.

[dropcap]С[/dropcap]еминарданий гьуртту хьун оьвкусса ДГПУ-лул профессор, биологиялул элмурдал доктор Нариман Тумалаевлул кIицI бувунни гьарцагу дуклаки оьрчIал хъунмур оьрму школалий лаглагишиву ва ххуйсса кIулшивурттацIун, гикку гайннал цIуллу-сагъшиврун буз­сса, нахIусса дукралул щаллушиннагу дикIан аьркиншиву. Бувсунни ванал мукунма марцIсса, химиялул состав мискинсса, личIи-личIисса «добавкартту» чансса дуки-хIачIиялул биялдаралу бушиву жула оьрчIал хIалгу, дарсирдахсса гъира-шавкьгу.

[dropcap]Ш[/dropcap]колартту дуки-хIачIиялул щаллу байсса «Махачкалапродукт» МКУ-рал хъунама МахIаммад Щайховлулгу мукунма кIицI лавгунни, цумур-цагу продукт ласайни, цал зузалтрал хъинну ялув бавцIуну, яла даражалул лахъсса, качествалул ххуйсса дуки-хIачIия ласун хIарачат байшиву.
Шикку мукунна ххал диргьунни Аьрасатнал СанПинрал тIалавшиннарду ва дуки-хIачIия ядайсса шартIру. Ихтилатру цIигьуртурал дянив мукунма хьунни школарттайсса дукиялул масъаларттая ва дуки-хIачIия ядайни цанна хьунадакьайсса диялдакъашивурттая.