[dropcap]Н[/dropcap]оябрь зурул 13-нний ДР-лул цIуллу-сагъшиву дуруччаврил министр Жамалуттин ХIажиибрагьимов ва ванал хъиривчу Салман АхIмадов бивунни ЦIуссалакрал райондалийсса 1-мур азарханалийн.
Имара Саидова
Вайннал ххал бивгьунни азарханалул идара, ялтту бувккунни цинярда отделениярттал, ххал бунни реанимация ва операцияртту байсса блок. Министрнал кIицI лавгунни шикку тамансса дахханашиннарду дан багьлай бушиву. Тавакъю бунни азарханалий дяхтта уттубишин бучIайсса къашайшалт гьарза баву.
Мукунма кIицI лавгунни операцияртту байсса блокрал давугу мюнпат буну дуллай бакъашиву, хирургиялул даву багьайсса куццуй дакъашиврийн бувну, къашайшалт операцияртту буллан республикалул азарханардайн занай бушиву. ЦIана ва азарханалий биялну бакъар реаниматологтал ва анестезиологтал. Мунийн бувну, азарханалул каялувчитурайн тапшур бунни материал-техникалул база цIубуккан бан ва кадрардал масъала щаллу буван.
«Райондалул азарханалул агьали дузал бан аьркинссар лавайсса медициналул кумаграл», — увкунни министрнал.
