Каспийскалий КурамахIаммад КурамахIаммадовлул цIанийсса физкультуралул комплексраву хьунни Аьрасатнал лайкь хьусса тренер,
дунияллул халкьуннал дянивсса категориялул судья МахIаммадрасул Илдаровлул 60 шинал юбилейран хас дурсса республикалул турнир.
ПатIимат Рамазанова
МахIаммадрасул 1-мур ЦIувкIратуссар, ваналли Дагъусттаннай кикбоксинграл школалул гьану бивзссагу. Ванал оьрму щалвагу аьрали искусствардан хас бувну бур, оьрмулул 13 шинаву боксрахун машхул хьуну ур, аьрали бурж биттур бувну мукьах – каратэлухун, мяйцIалку шиннардий тIурчарив, республикалий кикбоксинг машгьур дуллай айивхьуну ур. Тренерну зий чIявусса оьрчIру спортрахун машхул бувну бур, чIявуссанная цIакьсса спортсментал бувну бур. Бур ванал тарбия бувминнаву тренерталгу. Республикалул кикбоксинграл турнирданул сиптачигу ур ванала арс, тренер Аьлимурад Илдаров. Вагу кикбоксинграл тренерну ур «Развитие» ва «Сафинат» тIисса школардай. Ва ур буттал юбилейран хас дурсса турниргу, оьрчIал ва жагьилтурал дянив спорт машгьур дуваву мурадрайссар тIий.
«Кикбосинг Дагъусттаннай машгьурсса журар. Махъра-махъ хьусса чемпионатрайгума жулла республикалул командалул Аьрасатнал копилкалувун мусил ва арцул медаллу ларсъссар, гьаннайсса, республикалий кикбоксинграл гьану цIакьссар, ва октябрь зурул ахирданий хьусса турниргу, кикбоксинграл гьанулул чару цIакь буваву мурадрайсса давур. Республикалул гьарцагу кIанттурдаясса чIявусса спортсментал бувккунни ринграйн, миннан бахшишру ва дипломру буллуссар. Жул даврил агьаммур мурадгу спорт нахIу лавчIминнан кабакьаву буваву мурадрайссар», — увкунни Аьлимурадлул. Юбилейрал шингу духьувкун, цащалва, машгьурсса тренер МахIаммадрасуллущал хьунабакьинсса икьралгу дуварду, бусанну му хьунабакьаврия, хьусса ихтилатраягу хъиривсса цания-ца номерданий.
