Ноябрьданул 13-сса кьини щалла дунияллий кIицI лагайссар Чани чансса ягу бувагу чани бакъасса инсантурал кьинину.
З.АьбдурахIманова
Укунсса кьинилун хасну МахIачкъалаливсса кулпатирттан ва оьрчIан социал кумаг бувайсса республикалул Центрданий сакин дурну дия «Месячник белой трости» тIисса акция. Сайки ца зуруй най диркIсса ва акциялул лагрулий вайннал цала оьрчIан хъинну хIаз дизансса, вайннал дакIурдийн яла хъинми асарду биян бансса давуртту дурунни.
ОьрчIру ляличIисса бушивугу хIисавравун лавсун, центрданул пишакартурал вайннанми тяхъашивуртту дурну дия хъунмурчIин каруннах ках-шах тIисса, лахъну гъалгъа тIисса тIуркIурдая ва бяст-ччаллая сакин дурсса. Чани чансса оьрчIан яла ххирамур тяхъашивугу, отделениялул зузалтрал бусаврийну, дусса дур ссигъри бувчIаву. Акциялул махъра-махъсса кьини хьуну дия зурул дяниву дурсса ва оьрчIан лахьхьин бувмунил жям дуллалисса хъуннасса шадлугъ.
ОьрчIал цала тамашачитуран ва хъамаллуран хIисавсса нитти-буттан, уссурссуннан бувккунни ссутнихасса шеърирду ва щаллу бувунни дусшиврухасса балайрду ва къавтIавуртту.
Отделениялул хъунмур Гулзагьра Жаппаровал бусаврийну, вайннал пишакартурал мурад укун чани чансса ягу бувагу чани бакъасса оьрчIан халкьуннаву занакьулу хьун, яхъанан лахьхьин баву, гайннал цавунма цивппа лавгсса «цаннасса дунияллия» чаннайн буккан бансса хIарачат баву дусса дур.
«Гьантлия гьантлийн жучIанма бувкIсса оьрчIаву хьусса дахханашивугу, тяхъа буккавугу, пиш учавугу жу хIисав дувару жунна дуллусса ца ляличIисса бахшишран. Цалчин жучIанма бувцуну бувкIсса оьрчIал пашмансса симаннугу дакIнийну, жу жула каширдугу, пишардал опытгу ишла бувару хьхьичIва-хьхьичI гай тяхъа буккан буван. Мунияту жул дарсругу, мероприятиярттугу хъунмурчIин тIуркIулийнуссар дикIайсса»,-тIий бур ва.
Ларгмур нюжмардийгу ДГПУ-луву хьуна дурсса хъиривлаявуртту ххал дигьлагьисса ва хIасиллу дуллалисса гьарта-гьарзасса конференциягу. Ванийгу гьуртту хьуну бия ва аралуву зузисса пишакартал, жяматийсса ишккаккулт, педагог-аьлимтал ва ДР-лул соцразвитиялул министрнал хъиривчуну уттигъанну бивтсса ва «Ттул Дагъусттан» проектрал финалист хьусса ПатIимат Оьмарова.
