Ноябрьданул 16-нний МахIачкъалалив хьунни «Дагъусттаннал мусил ссут» тIисса республикалул шяраваллил хозяйствалул форум.
Муний шяраваллил хозяйствалул зузалтрал ккаккан дурунни цалла бакIлахъия ва сурсатру. ХьхьичIунсса ккаккияртту хьун дурминнан дуллунни бахшишру.
Форум тIитIаврий гьуртту хьунни Дагъусттаннал ХIукуматрал председатель Артем Здунов, ДР-лул Халкьуннал Мажлисрал председательнал хъиривчу СайгидахIмад АхIмадов, ДР-лул шяраваллил хозяйствалул ва бакIлахъиялул министр Аьбдулмуслим Аьбдулмуслимов, шяраваллил хозяйствалул предприятиярттал бакIчитал ва цаймигу.
Артем Здуновлул форумрал гьурттучитурахь ва бувкIсса хъамаллурахь барча дунни Шяраваллил хозяйствалул кьини ва форум баву. Мунал тIимунийну, Дагъусттаннал аграриялул бутIуву хъанай дур итталун дагьлагьисса дахханашивуртту: «ТIитIлай бур цIусса ризкьилул фермарду, аьнакIал фабрикартту, теплицарду, гьар шинал бугьлай бур азардахъул гектардал ахъулссаннул ва къюмайтIутIул багъру, шяраваллаву дуллай бур социал инфраструктура».
Артем Здуновлул хъузалтрахь барчаллагь кунни миннал буллалисса захIматрахлу, форумран чIа кунни тIайлабацIу, шяраваллил хозяйствалун – хьхьичIуннайсса ккакияртту.
Премьер-министрнал хъирив махъ лавхъунни Дагъусттаннал парламентрал спикер СайгидахIмад АхIмадовлул. Мунал тIимунийну, хIакьинусса кьини шяраваллил хозяйствалул давурттавух гьурттуну бур 55% республикалул агьалинал.
Шяраваллил хозяйствалул ва бакIлахъиялул министр Аьвдулмуслим Аьвдулмуслимовлул гьарза-гьартану бувсунни му бутIул тагьарданул ва мунил бучIантIимунил хIакъираву. Мунал тIимунийну, Дагъусттаннал ВРП-лул (Валовый региональный продукт) 5 бутIул ца бутIа хъанай дур шяраваллил хозяйство, микку зий бур захIмат буван бюхъайсса агьалинал 30%.
Гьашину 9 зуруй Дагъусттаннал агропромышленностьрал комплексран кумагран личIи дурссар 2,1 млрд. къуруш, миннувату федерал бюджетрава – 1 млрд ва 921 млн. къуруш, республикалул бюджетрава – 181,1 млн. къуруш. Гьашину 9 зурул мутталий шяраваллил хозяйствалул валовый продукциялул лагру хьуну дур 76,9 млрд. къуруш, дукIу вара чIумалних бурувгун – 102,1 процент. Дагъусттаннай ахънилссаннул цивппагу щаллу хьуну, Аьрасатнал цайми регионнайнгу дахлай бур 500-600 азарда тонна. Ризкьилул сурсатирттал хIакъираву тIурча, гьашину ларсун дур дукIунияр ххишаласса дикI ва дикIул сурсатру.
АПК-лул цаппара предприятиярттан дуллунни хIукуматрал грамотартту ва бахшишру, мукунна — ДР-лул Шяраваллил хозяйствалул бахшишругу.
ХIадур бувссар
ХI. Аьдиловлул
