Ниттихъал кьинилуцIун бавхIуну, вай гьантрай Росгвардиялул зузалт бивунни Аьрасатнал Виричу МахIаммад НурбахIандовлул нитти-буттачIан.
Вай бувкIунни Сергокъалалив «Аьрасатнал нинухъру» тIисса Щалагу Аьрасатнал жяматийсса суккушиндарал председатель Валентина Петренкощал.
— Зул арсная пахрулий буссар щалагу билаят. Янил ляпI къаувкуну кьамул бувссар бивкIу зул арснал. Мунал виричушиву абадлий дакIний дикIантIиссар, — увкунни Валентина Петренкол Виричунал нитти-буттащалсса ихтилатраву.
Каспийскаллал вневедомственный охраналул отделданул психолог Райсат ХIусмановал бувсунни цивппа ччя-ччяни хьунабакьайшиву къуллугърал бурж биттур буллай жанну дуллусса зузалтрал нитти-буттащал.
МахIаммад НурбахIандовлул ниттил Кумсиятлул барчаллагь увкунни хъамаллурахь.
