Дагъусттаннал поэзиялул классик Оьмардул Батирайн 200 шин шаврил юбилей дунни ноябрь зурул 9-нний Оьруснал драм­театр­дануву.

П. Рамазанова
Шадлугърал дайдихьу дуллалисса махъ лахълай, республикалул ХIукуматрал председательнал хъиривчу Анатолий Карибовлул кIицI лавгунни Батирай даргиял поэзиялул, литературалул гьану бивзма ушиву.
Батирайл канихчичрурду ва луттирду къабивкIссар, ванал чугурданухун учайсса бивкIссар цалва ляхъан бувсса балайрду, ми балайрду хIакьинусса кьинигу агьалинаву яхьуну бур ва машгьурну бур. Оьрмулуву­сса тIайладакъашивуртту дащуй дихьлахьисса, хъудугьул кьурчIисса тагьардания, мискиншиврия бюхханну бусласисса ванал шеърирду хIакьинусса кьинигу агьамсса мурадру гьаз буллалисса бур, гьаманки ваналли зунттал поэзия реализмалул ххуллийн бувцуссагу, — увкуна А. Карибовлул.

Дагъусттаннал Чичултрал союзрал председатель, МахIаммад АхIмадовлул бувсуна Батирай Зунттал билаятрал национал виричуну ушиву ва тарихраву мукуна личIантIишиву.
— Батирайл балайрду чувшиврул ва тархъаншиврул зума бувцIусса бур, ми зунттаву лявхъусса, зунттал кьуватгу, гужгу цавунма лавсъсса балайрду бур, — куна АхIмадовлул.
Батирайл творчествалун лахъсса кьимат бишлашисса ихтилатру бувна Аьрасатнал Чичултрал союзрал правлениялул секретарь, шаэр Геннадий Ивановлул, «Московский литератор» кказитрал хъунама редактор Иван Голубничийл, Ставрополлал чичултрал отделениялул председатель Александр Куприннул, даргиял чичултрал секциялул хъунама, профессор Муса БахIаммадовлул, Серго­къалаллал райондалул хъунама МахIаммад Оьмаровлул.

Батирайл цIанийсса Даргиял драмтеатрданул коллективрал ккаккан бунни классикнал оьрмулувасса парчри ва ванал произведениярттайн бувну бивхьусса спектакльлавасса бутIри, студентътурал, дуклаки оьрчIал бувккунни шаэрнал бивкIу ба­къасса шеърирду, увкунни балайрду.
Батирайл 200 шинал юбилейрал исват бунни шаэрнал пасихIсса ва бюххансса шеърирду хIакьинугу уттавану бушиву.