Бугьараминнал мажлис Вихьлив

Мажлисрал гьурттучитал

Най дур Ккуллал райондалул шяраваллаву яхъанахъисса бу­гьараминннал зурул лагрулувусса хьунабакьавуртту. Бугьараминнал буслай бур жагьилсса оьрмулия, ккавксса захIматирттая. 

Цанналагу зумату баллай бакъая «хIайп» тIисса махъ. Октябрь зурул 22-нний хьунни Вихьуллал культуралул къатлуву шяраву яхъанахъисса бугьарами хьуна бавкьусса гьарта-гьарзасса мажлис.


Мажлисрал сакинчиталну бия Вихьуллал культуралул къатлул зузалт, бугьараминнах ургъилшиву дуллалисса багьа бивхьуну зузисса социал зузалт, Вихьуллал шяраваллил администрация. Мажлис тIивтIуна ва бугьарами барча бувуна Вихьуллал культуралул къатлул каялувчи ХIасанхIусайнова Рукьижатлул. Ганияр махъ мажлис бачин бувну ия МахIаммадов МахIаммад. Шяраву муксса чIявусса бугьарасса инсантал бакъахьувкун мажлисрай гьуртту хъанай бивкIминналсса цIарду кIицI дуван ччива: Оьма­ров Оьма, ЧIанкIаев ЧIанкIа, МахIаммадов МахIаммад (Къапухъалма), Чаринова Мариян, МахIаммадова Аьйша,Чупанова Мариян, АхIмадова Ша­май,Сулайманова Па­тIи, Рашидова ПатIима.

МухIсин-ва Заннишат

Бугьарами тяхъа буллай балайрду тIий, къавтIавуртту дуллай бия: Вихьуллал шяраваллил искусст­валул школалул каялувчи ХIа­жиев МухIсин, культуралул зузалт Оьмариева Камилат, БухIанова Заннишат, Халилова Шамсият, СайкIуева Жамиля, социал зузалт МахIаммадова Гугьарша,Мянчиева Зуйли­шан,МахIмудиева Мальвина.

Сайки циняв мажлисрай гьур­­тту хъанахъиминнал бувсуна цала оьрмулия ва барча бувна мажлисрайн бавтIмий. Гьай-гьай мажлисрайн бавтIмий барча бувуна шяраваллил администрациялул бакIчинал Сулайманов СайкIулгу. Тяхъашивуртту лахъи ларгуна ахттакьуннин. ЦIуллу баннав зу зунттал шяраваллал яхIлувтал!