[dropcap]О[/dropcap]ктябрьданул 17-нний ДГПУ-лул дагъусттаннал филологиялул факультетрай «Дагъусттаннал миллатирттал мазурдийсса тотальный диктант» тIисса акциялун хасъсса шадлугъ хьунни.

З.АьбдурахIманова
Шадлугърай гьуртту хьунни ДР-лул Миннацрал министрнал буржру чIумуйну биттур буллалисса Т.Гамалей, ДГПУ-лул ректор М.МахIаммадова, Дагъусттаннал Чичултрал союзрал хъунама М.АхIмадов ва цаймигу.

Акциялий гьуртту хьун ччиминнаща ниттил мазрай диктант чичин бюхъаврил пагьму ххал бан бюхълай бия МахIач­къалалив кIива вузраву ва республикалул муниципалитетирттай.
«Шанна шинни жула респуб­ликалий ва акция дуллай. Ванил щала ххуйшивугу, мяъна-мурадгу Дагъусттаннал культуралул ва мазурдил байрандалул хьунийн дуллалаву дур.
Миллатирттал мазурдил ялун биллалисса буруккинттугу хIи­савравун лавсун, шиная шинайн жула халкьуннавугу ниттил мазрай диктант чичин ччишиврухсса гъира хъун хъанай бур, цанма цуксса ниттил маз кIулну бурив ххал бан ччисса кунма. Акциялул хъунмур мураднугу хъанахъиссар авадансса дагъусттаннал культуралух, миллатирттал мазурдих къулагъас дуллали баву»,-увкунни Т.Гамалейл.

Шиккува кIицI лаган, Да­гъусттаннал культуралул ва мазурдил кьини республикалий кIицI лагайссар октябрьданул 21-нний.
ДГПУ-лул дагъусттаннал филологиялул факультетрай миллатирттал мазурдий диктант чичин бувкIминнавух, жагьилтал ба­къасса, бия бугьарами ва оьрмулул дянив­сса шиннардивумигу. Бия миннавух чичулт, аьлимтал, шагьрулул школарттал учительтал, ишбажаранчитал.
ХIайп, лакку мазраймур диктант чичлачиминнавух тIурча, так ва факультетрал студентътал ва преподавательтал бакъа ба­къая. Вайминнан ча-бухьурчагу бавну, жуламинаннив къабав­сса? Къавихра!

ДГПУ-лул дагъусттаннал филологиялул факультетрай лакку мазраха зузисса Римляна Сааьдуллаевал ва ПатIимат Шабановал хIарачатрайну, цалами студентътал бакъасса, шиккун бувкIун бия вузрал вайми факультетирттай дуклакисса лакрал жагьилталгу. Барчаллагьъя цайн! Ниттил мазрай диктант чичаврил акциялий гьур­тту хъанай гьашину ттулагу кIира шинни, цIуллушиву духьурча, ялун-тулунгу хьунна.
Филологиялул элмурдал кандидат Римляна Сааьдуллаевал диктантран язи бувгьуну бия аьлимчу, аьрабист, хъунасса дурккучу Аьли Къаяевлуясса хавар. Дия диктантрал сакиншинначитурал ккаккан дурсса лагрулий­сса цила низамгу. Диктант дайдишин хьхьичI Татьяна Гамалейл ва ДГПУ-рал ректор Марина МахIаммадовал, циняв аудиториярттавух бувккун, гьурттучитуран тIайлабацIу ва хъиншивур­ттугу чIа увкуна.