УрчIцIалла шинавусса хъуначунал лаизаву

1943-1944-ку шиннардий Бабаюртуллал райондалий­сса Львовскаллал номердай ялапар хъанай бивкIсса нимиц бизан бувну, гайннахь диркIсса аьрщив дарчIуну диркIссар лакрал, яруссаннал ва къумукьнал цаппара колхозирттайх. Гъаттара-ятту гьарзасса Кьубия­хьхьунгу дагьссар Львовскаллал 2-3-мур номердайсса аьрщи. Га аьрщи Кьубиял хьуния шихунмай­сса ганил багьу-бизугу, гиччаллил оьмур-хъинмургу бавхIусса бур ттул ттуламур оьрмулул иширттацIунгу.


Тания шихуннай ларгун дур арулцIаллахъул шинну. Гикку­сса къатри чIяруми аьрщарал калпуширттая дурсса дия. ХIакьину тIурча, цIу-цIусса къатригу хьуну, шяравалугу цIу ларгун дур. Гикку цIана дур халкь ялапар хъанахъи­сса 100-ннийн дирсса тIюварду. Бу­ссар хъунмасса дянивмур даражалул учкъула, цимирагу шинни тIивтIуну интернатгу. Буссар зий Аллагьнал къатта – мизитгу.

Ва ххуллух чичин дакIнийн багьсса ттул макьалалул сайки леххаврийсса лаизаврил хъунмур затгу укунсса бур. ХIакьину гикку­сса жяматгу, учкъула-интернатгу махIрумну ливчIун бур, лакку мазрайсса кказит-журналлу къабукIлай. Хъунмур хаваргу жула лакрал миллатрал ххазинану хъанахъи­сса «Илчилуятуссар». ТIайлар, хIакьину, телевизордая, теле­фон-компьютердая байбивхьуну, ччимур информация най дур агьалиначIан. Ахир, миннуллив ххассал бантIисса нигьачIавривун багьсса миллатрал мазгу, аьдат-эбадатругу, багьу-бизугу!?

Шяраваллил дачIирагу къа­диркI­сса, байбихьулул учкъула бакъа къабивкIсса совет заманалул чIумал, тIивтIунугу, зийгу бу­ссия шяраваллил клубгу, библиотекагу, пучгу.
На нава «Илчи» кказит кIил­чин дунияллийн буклай байбивхьуния шихунмай, ца махъ лях къакьабивтун, ккалаккисса буккуну ура, ттула бюхъулух урувгун, кказитрайн ци-бунугу чичлачисса уртакьгу ура.

Жула «Илчилий» зузисса, бюхъу ххисса коллективрал авадансса ла­кку мазрай хIадур дурну дикIай цаннияр ца агьамсса, аьркинсса материаллу, дур щалагу дунияллуцIун дархIусса информациярттугу. ХIасил, кказитрай ччимур бур, куртIну ккалаккинан.
Тани, чIаххувсса, кIира кки­ламитIрарагу дянив дакъа­сса, къумукьнал шяравусса пучрал идаралия кьини ляхну пучгу букIлай, пуч ласугу занай, гьарца къушлийн бияйссия чивчумур. КъакIулли, хIакьину жува курчIил хьуну б­уссарув, ягу Бабаюртуллал вив буруча, миннал бача мунилсса тIий бу­ссарув, амма тагьар хъинну сант да­къасса дур. Ттула пикрилий, мунилсса банма акъа личIаврил аьй дур шяраваллил администрациялий: цила чIумал чичингу буллай, биян буллан­сса хIалугу дузал дуллай (Ла­ккуйгу, аривгу), агьалиначIан, пенсионертурачIан лакрал кказит букIлакIаврил ялув цалчин администрация бавцIуну бикIан аьркинссар.

«Илчи» кказитрал буру­ккин­ттарая ливчуну махъ ца цамургу бур ттула дакIниву цIуцIисса масъала – Хъун дяъвилий шагьид хьусса Кьубиял вирттаврал аьпалун дацIан дурну диркIсса гьайкалданул бакIрачIан букIлакIимур. КIа гьайкал, жяматгу гьуртту хьуну, колхозралгу ка-кумаг бувну, Щурагь дан дурну, тай ряхцIалку шиннардийра дацIан дурссия. Чаругу, кIукIлу чару бивкIун, зизлай, лихлай, цIардугума чIалакъачIисса кIанайн дагьну дур. Гьайкалдания «Илчилий» чигу-чивчуссия. Нава «Илчи» ккала­ккийни, цайми-цайми щархъаву, ишбажаранчитурал ду­ллалисса, ххуй-ххуйсса, жяматрал цIанийсса давурттив чIалай, мяш хъанан икIара. Ахир, кIани-кIанттайх ппив хьу­сса, ишру нанисса Кьубиял арсурваврал дянив бакъа­ссарив, къаля­къайссарив бюхъулул заллухъру, жяматгу цачIу-чIаравну, шяраваллил кьинирдугу, гьайкаллачIа дуллай диркIсса байраннугу щаллу дуллансса хIакьсса вирттал?

Цала жяматрал, шяраваллил чIарав мудангу ацIлай ивкIсса, ххалли-ххаллилсса давурттив дугу-дурсса, Мулинхъал Гъазигу хIакьину къаша-шавай ур. Га акъахьурча, цайми къабикIан аьркинссарив?

Хъуначу Оьмахан,
ш. Кьуби