Неххал кIира зума»

Вай гьантрай Краснодардай хьунни машгьурсса чичу, тарихчи, Мариян Ибрагьимован 100 шин шаврил юбилейран хас дурсса литературалул ва музыкалул фестиваль — «Неххал кIира зума».

Зулайхат Тахакьаева
Му сакин дурну дур Краснодардал крайрайсса Дагъус­ттаннал вакил МахIаммад Нуруттиновлул (яручу) сипталий­ну, Краснодардал крайрал администрациялучIасса виваллил политикалул департамент­рал ва Культуралул министерствалул кабакьаврийну.

Муний гьуртту хьунни Краснодардал крайрал ва Краснодар шагьрулул администрациярттал бакIчитал, муниципал сакиншиннардал вакилтал, вузирдал ректортал, студентътал; Адигнавасса, Къарачай-Чаргаснал республикарттаясса ва къубаннал казачествалул делегацияртту, жяматийсса ккуранал вакилтал, Мариян Ибрагьимовал арс Рустам ва гъан-маччами.
Дагъусттанная фестивальданий гьуртту хьунни Лакрал райондалиясса биялсса делегация: Хъунисриннал советрал хъунама Даниял Магьдиев, Гъумучиял школалул директор Ххадижат ХIусниева, Муса Маннаровлул цIанийсса музейрал зузала Шарипат Къантулаева, Магьирлугърал къатлул зузалт ва дуклаки оьрчIру.

Фестиваль лайкьсса даражалий дан бувсса кабакьаврихлу МахIаммад Нуруттиновлул барчаллагь увкунни Краснодардал к­райрал губернаторнал хъиривчу Алексей Капайгородскийхь, культуралул министр Виктория Лапинахь, казакнал генерал Владимир Громовлухь.

«Фестивальданун «Неххал кIира зума» тIисса цIа дизаврил дуссар цила мяъна. Му дархIуну дур Мариян Ибрагьимовал мархрацIун. Мунил ниттил ца нясав диркIссар Гаври тIисса казакнал тайпалиясса, вамур нясав – лаккучу ппу Ибрагьим Давыдов ивкIссар Пущинхъал дворянтурал тухумраясса.
Циятува Мариян Ибрагьимовал увкуну бур: «Ккавкказ ттун ххирар буттал кIану кунма, Аьра­сат – нину кунма».
Байрандалул программа чIюлу дурунни Къубаннал казакнал хорданул, Краснодардал крайрайсса дагъусттаннал къавтIавурттал ансамбльданул, АьлихIажи Щамххаловлул ва Лаккуясса къавтIалтрал.

Лакрал райондалул бакIчи Юсуп МахIаммадовлул ва чичул ватанлувтурал цIания Краснодардал крайрал агьулданухь барчаллагь тIий, Даниял Магьдиевлул бувсунни Мариян Ибрагьимовал юбилейран хас дурсса шадлугъ дан дакIний бушиву Гъумук ва оьвкунни тайннайнгу муний гьуртту хьун.