Лениннул комсомолданун 100 шин шаврил юбилейрал хьунийн Къаякантуллал райондалий «Новокъаякант» тIисса аэродромрай сентябрьданул 29-нний хьунни «Кубок Каспия» тIисса парашютрал спортрал Аьрасатнал бяст-ччаллу.
Шадлугърал тагьарданий бяст-ччаллу тIитIаврий гьуртту хьунни ДР-лул ХIукуматрал председательнал 1-ма хъиривчу Анатолий Карибов, ДР-лул спортрал министр МахIаммад МахIаммадов ва цаймигу. Микку махъ лахълай, Анатолий Карибовлул бувсунни бяст-ччаллу хас бувну бушиву дяъвилий гьуртту хьуну бивкIсса 180 дагъусттанлувнан ва 75 Совет Союзрал Виричунан, миннавух бивкIсса летчиктуран.
Мунал барчаллагь кунни парашютрал спортрал бяст-ччаллу сакин бувминнахь.
Яла ихтилатру бунни МахIаммад МахIаммадовлул, отставкалийсса полковник МахIарам Аьлиджановлул ва райондалул бакIчи МахIаммадэмин ХIажиевлул.
Бяст-ччаллавух гьуртту хьунни Ростовуллал, Волгоградуллал, Москавуллал улкрал, Ингушетиянал, Ухссавнил АьсатIиннал, Чачаннал республикарттал ва чIявусса шагьрурдал вакилтал. Бяст-ччаллу хас бувну бия виртталсса летчиктуран: АхIмад-хан Султаннун, Юсуп Акаевлун, Валентин Эмировлун, Леонид Гальченкон, Александр Ситковскийн ва цайминнан.
ХIадур бувссар
ХI. Аьдиловлул
