ОьхIалсса идеология сагъну дикIан къааьркинссар

Дагъусттаннай Тюбе поселокрайсса «Сарыкум» отельданул конференц-залдануву хьунни «Цифровой дунияллий экстремизмалийн ва терроризмалийн къарши бацIаву» цIанилусса дунияллул халкьуннал дянивсса V-мур элмийсса конференция.
Ванил сакиншинначитал хьунни ДР-лул Информатизациялул, дахIаврил ва массовый коммуникациярттал министерство ва Аьрасатнал террорданийн къаршисса национал комитет. Шикку гьуртту хьунни Аьрасатнал личIи-личIисса субъектирдал ва кьатIаллил билаятирттал вакилтал. Миннавух бия Ливаннаясса, Пакисттанная­сса, Сербиянавасса хьхьичIунсса экспертътал. Конференциялул агьаммур мурадну бия экстремизмалул ва терроризмалул идеологиялийн информациялийну къарши бацIаврил жула билаятрал ва цайми хIукуматирттал опыт ххал баву.

Андриана Аьбдуллаева
Конференция дачин дурну ия ДР-лул ХIукуматрал Председательнал хъиривчунал кIанайсса Рамазан ЖахIпаров.
Шикку ихтилат бунни Да­гъусттаннал БакIчи Владимир Васильевлул. Ванал кIицI лавгунни, ттизаманнул хIукуматирттал мюхчаншиву дузал даву мурад­рай хьхьичI ххуттайн лавсъсса масъаларттавасса ца яла хъунмурну хIисав хъанай бушиву экстремизмалийн ва терроризмалийн информациялийну къарши бацIаврил масъала, терроризм мархлуцIакул марцI дан бигьану бакъашиву.

— 2017 шинал щалагу Европанавух терактирдал щатIи бивщунни.
Жунма дакIнийссар Санкт-Петербургуллал метролувусса пIякь учаву, Стокгольмрай, Лондоннай, Манчестерданий, Испаннаву хьусса оьзрусса ишру. Тара чIумал Къизлардай террористурал бивтун бивчуссия килисалучIасса хъами. Миннава ххюва хъамитайпа оьрмурдацIа хьуссия.
Терроризмалия нигьачIаву дур щалагу дунияллул халкьуннан, лахъисса чIумуй терроризмалущал талан багьсса Ух­ссавнил Ккавкказнаву, хаснува Да­гъусттаннай, салкьи хьуну бур мадарасса опыт.

Му опыт Аьрасатнал ва Дагъусттаннал халкьуннан ххирану бавцIунни. Терроризмалийн данди бавцIуну, жанну дуллунни чIявусса Аьрасатнал ва Да­гъусттаннал арсурваврал ва душварал. Дагъус­ттаннайри террористурал кьюкьри бат дансса, хьхьара дансса мюнпатсса чараннугу лявкъу­сса, — увкунни Владимир Васильевлул. Террорданийн къарши бацIаву мурадрай региондалий дурсса давурттая буслай, респуб­ликалул БакIчинал барчаллагь увкунни республикалул агьалинахь, гужирдал структурардал ва спецслужбардал зузалтрахь Дагъусттаннай ва щала округ­рай мюхчансса тагьар дузал даврихлу.

— Жу зий буру коррупция духлаган дансса чаранну ляхълай. Дуллалисса даврил хIасиллу оькки­сса хъанай дакъар. Бюджетрал арцу ялу-ялун чIярусса диллай дур республикалул агьалиначIан. Утти­ния тихунмайгу жу хъиннува ялув бацIантIиссару налог­ру ратIаврил, къуллугъчитурал арцу чун, цукун харж дуллай бурив кIул баврил, — увкунни ялагу республикалул БакIчинал. Мукунма ванал бувсунни региондалий хьусса кадрардал конкурсирттаягу.
КIицI лавгунни вай конкурсирттал хIасиллайн бувну къуллугъирттай битлай бушиву гьунар бусса, жяматрай дакI цIуцIисса инсантал, укун­сса тIайлашивугу терроризмалул идеологиялийн къаршину бацIансса ца чаран хъанахъишиву.

Хъирив ихтилатру бунни НАК-рал аппаратрал «И» управлениялул хъунаманал хъиривчу Андрей Кокоуровлул, Пакис­ттаннал Терроризмалущал талатисса Национал управлениялул директор Фархан Захидлул, 1996-2005 шиннардий Ливаннал Аьралуннал информациялул ва жяматращалсса дахIаврил директорну ивкIсса Элиас Салим Фархатлул ва м.ц. Конференциялул лагрулий бахшишру дунни Аьрасатнал Виричу МахIаммад НурбахIандовлун хас бувсса шеърирдал автор, Белгород шагьрулул 42-мур школалул 9-мур классрал дуклаки душ Юлия Калининан, «Слово как оружие» тIисса документал фильмрал автор, «Дагестан» ГТРК-лул директор Луиза Аьли­ханован, республикалул дуклаки оьрчIал дянив баян бувну бивкIсса терроризмалул идеологиялийн къарши бацIаврил темалийсса эсселул конкурсрай ххув хьуминнан. Бахшишру ларсминнавух бия КIундиннал школалул 10-мур классрал дук­лаки оьрчI ХIажиев МахIаммад ва Ккуллал 1-мур школалул 11-мур классрал дуклаки душ Кьадирова ПатIимат.