Кучардайсса давуртту щириркIуну дур

[dropcap]В[/dropcap]ай гьантрай ДР-лул ХIуку­матрал председательнал хъиривчу Рамазан Жяъппаров ДР-лул транспортрал ва ххуллурдал хозяйствалул министр Ширухан ХIажимурадовлущал ва МахIачкъалаллал

бакIчи Абуссупиян ХIасановлущал «Мюхчансса ва ххуйсса ххуллурду» тIисса федерал проектрал лагрулий хъуншагьрулий бакьин буллали­сса кучардайх увккунни. Къуллугъчитурал къулагъасралун дагьунни Сулаймановлул (Щорслул), Некрасовлул ва Мичуриннул цIанийсса кучардайсса ххуллурдайх асфальт бакьлакьисса давуртту.


З.АьбдурахIманова
Шиккува кIицI лаган, вай кучарду бакьин бувну бивкIссар сайки 10 шинал хьхьичI. Машинарттал су­ккушин гьарзасса, чIявусса халкь заназисса, тиягу, шиягу азарханарду, школартту, поликлиникартту, базарду бивхьусса кучардур.
Вай шанмагу кучалий хIакьи­нусса кьининийн даххана дурссар ххуллурдацIсса бордюрду, цIу дур­ссар канализациялул кьалакьив ва цIана ми ца лахъшиврийн дуцлай, махъра- махъсса асфальтрал къат дакьинсса хIадуршинна най дур.
Аьмну давуртту нани дурну дур 26 азарда кв.метралий. Кучарду бакъасса, бакьин буллай бур бахьттагьалтрансса ххуллурду ва тротуардугу. Шанмагу кучалул тротуардахь дур 5 азарда кв.метра.
УЖКХ-лул пишакартурал бусаврийну, шикку зузисса подрядчиктал жаваблувсса, низамрай давуртту дуллалисса бусса бур. Вайннал даврил даражагу ххал буллай бур щилкIуй биялалуву бакъасса лабораториялул зузалтрал. Масалдаран, вай кучардайх бавкьусса асфальтрал анализ дуллай бусса бур Аьшттарханнаясса «Каспий» тIисса федерал ххуллурдал управлениялул лабораториялий.
Зузалтрал бусаврийну, кучарду, ххуллурду бакьин буллалийни, чIярусса дахшишрурду шай­сса дур, шикку ялапар хъанахъисса халкьуннал машинартту бу-буний кьабивтун, хьхьичIра къабагьавай дирхьу­сса чапарду ду­къакьлай, строительствалул цIинцI-ччюрк кучардайра къадитлай, авара бай­сса бур.
Вай иширттал хIакъираву къуллугъчитурал бунийва хIукму бунни, ихтиярду дуруччай къуллугърайн оьвкуну, протоколлу чичин бан, эвакуаторду бучIан бан ва цаймигу администрациялул аькIри дишин буллан.
Аьрххилул хIасиллу дуллай, Абуссупиян ХIасановлул кIицI бувунни, цIана МахIачкъалалив унгу-унгуну ххуллурду ва кучарду бакьин буллалисса авара бушиву, ацIрахъул шиннардий бакьин къабувсса кучарду мяйжаннугу оьккисса тагьарданий бивкIшиву ва дукIусса шинал федерал программа щурущи дурния махъ чIярусса чIалансса дахханашивуртту хъуншагьрулий хьушиву.
Шинал ахирданийннин Ма­хIач­къалалив бакьин бан­тIиссар 99 ххуллу ва шагьрулувун бухлахисса 8 ххуллу. Федерал бюджетрава вай давурттан ккаккан дурну дуссар 765 млн.арцул. Вайкссара арцу республикалул бюджетрава итадаркьуну дуссар МахIачкъалаллал агломирациялунгу.