МахIачкъалалив, Национал библиотекалий хьунни «World Folк. Vision» цIанилусса Щалагу дунияллул миллатирттал культурардал ва искусствалул фестиваль-конкурсрал хIакъиравусса пресс-конференция.
Шикку гьуртту хьунни ЕОЭС-рал (Евразийское общество экономического сотрудничества) культуралул масъаларттаха зузисса советрал комиссар Жанна Барсегова, Аьрасатнал ПрезидентначIасса инсаннал ихтиярду дуруччай комиссиялул член, кIицI ларгсса фестивальданул Ухссавнил Ккавкказуллал федерал округрайсса национал директор Разита Мушидова, дизайнер, художник-модельер, фестивальданул сакиншиндарал комитетрал член Индира Бадияр.
Андриана Аьбдуллаева
Фестиваль-конкурсрал хIакъираву ихтилат бунни Жанна Барсеговал. Ванил бувсунни Щалагу дунияллул миллатирттал культурардал ва искусстволул фестиваль-конкурс цIакь дуршиву 2017 шинал август зурул 3-нний Италиянаву Культуралул, элмулул ва дуккаврил масъаларттаха зузисса Евразиянал Советрал, хIакьинусса кьини проектраву гьурттушинна дуллай бушиву 86 билаятрал вакилтал, миннава 63 билаятрал вакилхана муданма зузисса бушиву. Проектрал мурад бур миллатирттал культура ва туризм хьхьичIуннай даву, ми Щалагу дунияллухь майшан чаву, мунийхчин регионнайн туристал кIункIу баву. Жула билаятрай цалчинсса «World Folк. Vision» конкурс хьуну дур июнь зурул 1-нний Москавлив, Кремлилул ЧIалъаьлуву.
Микку гьуртту хьуну бур 14 паччахIлугърал вакилтал. Ва дахьра дайдихьу хьуну дур. Утти яла хьхьичIунми, яла тамашами язи бугьлагьисса конкурсру нантIий дур Аьрасатнал циняв регионнай. Дагъусттаннай конкурсрал отборочный этап хьунтIиссар октябрь зурул 21-нний, Яруссаннал театрдануву. Шикку гьуртту хьун бюхъантIиссар ччимур оьрмулувусса творчествалул коллективирттаща, сахIналул искусствалул вакилтураща. Цала гьунарду миннаща ккаккан бан бюхъайссар цумур духьурчагу жанраву, профессионалтал хIисаврайгу, любительтал хIисаврайгу. Вайннал бюхъу-гьунардан кьимат бищунтIиссар фестивальданул экспертътурая ва Аьрасатнал ВУЗ-рдал преподавательтурая хьусса жюрилул. Дунияллул личIи-личIисса хIукуматирттай региондалул этапрай ххув хьуми (полуфиналистал) гьуртту хьунтIиссар цания-ца паччахIлугърай хьунтIисса финалданий. Финал дансса шагьругу язи бугьантIиссар конкурсрал гьанулий.
— Жун ччай бур ва фестивальданийн чIявусса инсантал кIункIу бан, профессионал икIу, любитель икIу, цала миллатрал культура ккаккан дан бюхъайсса гьарицагу инсан. Жу хIадурссару миннал бюхъу-гьунар ххал бан, ми цайминнангу ккаккан бан. ЧIявучин къакIулсса, цIарагу къабавсса мюрщисса шяраваллавугу ца-ца чIумал тамаша дизансса, щихачIав къалархьхьусса культура ашкара шай. Жун ми билаятрал ва дунияллул халкьуннахь майшан учин ччай бур, — кунни Жанна Барсеговал. Ванил ккаккан дунни финалданий ххув хьуминнан дулунтIисса магьирсса заргалтурал чарвитуя ва малахитрая дурсса статуэткагу, ингилис мазрай чичру дурсса ва «мусил» печать бивщусса сертификатгу. Конкурсрай гьуртту хьун ччиминнайн оьвчавугу дуллай, тIайлабацIугу чIа тIий буру.
Конкурсрал хIакъираву цIухху-бусу бан бюхъайссар вай номердай: 8(926)383-88-88; 8(926)846-28-98.
