Октябрьданул 1-нний Н. Юсуповлул цIанийсса Республикалул ОьрчIал библиотекалий хьунни АьФ-лул ва ДР-лул культуралул лайкь хьусса зузала, жулла республикалий яла цIа ларгмур библиотекарь,

мукьра шинал хьхьичI аьпалул хьусса Султанова Кубра Кьурбанаьлил душнин 80 шин шаврин хас бувсса аьпалул мажлис. Му сакин бувну бия ванияр чIярусса шиннардил хьхьичI Кубра Аьлиевнал хIарачатрайну тIивтIусса, 40 шинай мунил каялувшиврулу зий бивкIсса ва библиотекалул коллективрал.

---

Ххаллилсса зузала, Ваччиял щарнил ва лакрал миллатрал язи­сса душ, хIакьсса зунттал хъамитайпа, даврил уртакь дакIнийн бутан бавтIун бия лакрал, Дагъусттаннал интеллигенция, Кубралул оьрчI-душ, махъсса гъан-маччами.
БатIаву дачин дурну бия Н. Юсуповлул цIанийсса Республикалул оьрчIал библиотекалул хъунмур СултIанат Загьидова. Цила ихтилатраву ванил кIицI лавгунни Кубра Аьлиевнал республикалул библиотекарттал даву цамур даражалийн лахъан дуршиву, му чулуха махъун дагьну диркIсса респуб­лика билаятрай ва дунияллул халкьуннал дянив хьхьичIун дуркшиву, дакIнийн бувтунни цукун усттарсса сакиншинначи бивкIссарив, мунил сипталийну дуллай бивкIсса хъин-хъинсса давуртту (музыкалул ва литературалул композицияртту, луттирал театрду, выставкартту, ихIсаниятрал вечерду ва цаймигу) уттигу дачин дурну най бушиву, цила каялувшинна дуллалисса коллективраву ванил мудангу, ца хъунмасса кулпатраву куннасса, гъилисса арарду-тагьар хIасул дувайсса диркIшиву.

[dropcap]У[/dropcap]куннасса тагьар хIасул дурну дия ва кьинигу: аваданну тIивтIусса ссуп­ралухун, ца хъунмасса кулпат кунма, бавтIун бия Кубра Аьлиевна дакIнийн бутан. Ссупралух ца бачIвасса кIану ливчIун бия – Кубра Аьлиевна бувкIун щябикIан нанисса кунма. Ва архIал, чIарав бакъанугу, ванил иминсса зана-кьулушин щуркIал хъанай дия библиотекалул жанахIравун буххайхтува, лагмара: низамрай, урувг­нал я бацIанну луттирду бивхьу­сса чIамурдай, экрандалий, царай лаглай, гайми дукIлай, липI-липI тIисса Кубра Аьлиевна хIаласса суратирттай, ванищал кIулну, архIал зий бивкIминнал пашманну чанна лархъсса симаннай ва миннал буллалисса дакIнийхтунусса ихтилатирттайну. Цимурца ва кьини дия Кубра Аьлиевнан ччисса куццуй: чаннану, аваданну, дакI тIиртIуну.

Ихтилатру бунни Республикалул ОьрчIал библиотекалул элмийсса ва методикалул отделданул хъунмур Лилия Удаловал, ДАССР-данул культуралул министрну ивкIсса АьвдуллатIип ХIажиевлул, Кубралул гъанчу Киров Султановлул, шаэр Ссугъури Увайсовлул, профессор Кьурбан Гаммацаевлул, РАН ДНЦ-рал хьхьичIунсса зузала, искусствоведениялул кандидат Гулизар Султановал, Мариян Илиясовал цIанийсса «Дараччи» фондрал каялувчи Гульшан Хасаевал, Республикалул Национал библиотекалул культуралул программарттал отделданул хъунмур Муслимат Абакаровал, ДГУ-лул Элмийсса библиотекалул директор Лариса Тапаникинал, Медициналул университетрал Элмийсса библиотекалул директор Венера Мусаевал, Б. Мурадовал цIанийсса Дагъусттаннал культуралул ва искусствалул колледжрал преподаватель Жарият Хаппалаевал, Республикалул оьрчIал библиотекалул зузала ТIагьират Алес­керовал, Физикалул институтрал хъунмур элмийсса зузала Наида Абакаровал, Национал библиотекалий зий бивкIсса Тамара Кьурбановал.

[dropcap]К[/dropcap]убра Аьлиевная бусанмур гьарцанналгу къачанъя. Гьарцагу ихтилатчинал Кубра Аьлиевна дакIнийн бутлай бия дакI марцIсса, цаманан хъинбала буван ччисса инсанну, библиотекалул даврих эшкьи хьусса, мунил куртIшивуртту ва кьюлтIшивуртту кIулсса, цилва пишарайн хаин къавхьусса пишакарну. Ккулатусса Халидлул ва Ваччатусса Кубралул сакин бувсса кулпатраву чIявуну хьуми буслай бия цукун бавкьусса, кувннал хIурмат кувннал бусса кулпат бивкIссарив вайннал. КIицI лавгунни ванил лакрал хъаннил «Дараччи» клуб­рал гьурттучи хIисаврай буллай бивкIмургу.
Гульшан Хасаевал увкусса ку­ццуй, Кубра Султановал цIанил авадан дурссар миллатралгу, респуб­ликалулгу ххазинану хъанахъисса инсантурал сияхI.
Ахирданий махъ лавхъуна Куб­ра Аьлиевнал арснал Аьвдулкьадирдул:

— ОьрчIниява ххирассия шиккун укIлан, мудангу караматсса атмосфера бикIайва шикку, хIакьинугу махъунай гай шиннардивун зана ивкIсса кунмасса асарду хьунни. Ххарира ттула ниттил хIасул дур­сса аьдатру зу гихуннайгу дачин дурну бушиврия. Барчаллагь зун хъунмасса, ниттил бувсса захIматрал кьадрулухлу, ганил аьпа ябуллалаврихлу, — куна ванал.