ХIажлил цIушинна – электрон паспортру

Ларгсса тталаткьини хIажлил хIасиллая бусан дагъусттаннал журналистътуращал хьунабавкьунни Динийсса идарарттащал зузисса комитетрал хъунаманал хъиривчу Расул ХIажиев ва хIажлийн агьали биян бувсса,

бувцусса «Марва- тур» фирмалул гендиректор Булат Кьурбанов.


П. Рамазанова
Расул ХIажиевлул кIицI лавгунни гьашинусса хIаж рищун­сса аьй дакъасса даражалий хьушиву. Бувсунни хIажлилсса буллалисса циняр структурарду, Роспотребнадзорданул, таможнялул къуллугърал зузалт уртакьну зий бивкIшиву даву сантирай дуван ва хIаж наниссаксса хIаллай Аьрабусттаннай цалва комитетрал ва Марва-турданул вакилтал бивкIшиву, мукунма Комитетрал «Горячая линиягу» хIасул дурну, зузалт яржа бивхьуну дежурствалийн буклай бивкIшиву. Булат Кьурбановлул бувсунни цува каялувшиву дуллалисса турфирмалийхчIин тIайланнасса рейсру дурну хIажлийн биян бувшиву 6852 инсан, ва 2198 инсан цайми рейсирдайхчIингу биян бувшиву. Бувсунни дагъусттаннал хIажитал тIайла буккансса ца рейс Москавлиягу дуршиву.

«Цайми регионная хIажлийн лавгун бур гьашину 3 азара инсан, Дагъусттанная – 6 азара, аьмну 10 азара инсан хъанай ур, ми циняв цIуллуну , сагъну шаппай зана хьуссар, ца жагьил Аьрапалул кьини ивкIуну, тихва уччин багьунни. Группардал хъунимигу тихун тIайла букканнин хъинну хъирив лавну хIадур бувссар, миннан хIажитуращал ччимур ишираву хIалимну зун лахьхьин бувссар»- увкунни Б. Кьурбановлул.

Ванал бувсунни гьашинусса хIажлил цIушинналиягу – электрон паспортирттая. Футболданул дунияллул чемпионат нанисса ппурттуву электрон паспортру бувну бивкIун бур болельщиктуран, мува кьяйдалий хIажитурал паспортругу бувну бур. Даву цукун дачайрив ххал дан цалсса ттурша инсаннал паспорт бувну бур, ми ттуршвагу паспортгу Марва- турданийн тапшур бувну бур, Аьрасатнал хIажитурава яла чIявуми Да­гъусттаннаятусса бикIайну тIий. Му электрон паспорт- бейдж хъанахъиссар хIажинал документ. Фирмалул офисрава му паспортрал залуннал хъирив бацIан бюхълай бур, му къааьйкьиншиврул. Ва къулайшинна ялу- ялун ишлану дикIантIий дур.