Октябрьданул 1-нний МахIачкъалалив, Къумукьнал театрдануву, тIиртIунни Дунияллул халкьуннал дянивсса «Порт-Петровские ассамблеи» тIисса цIанилусса ХI музыкалул фестиваль. Фестиваль дуллалиссар Т. Мурадовлул цIанийсса Дагъусттаннал паччахIлугърал филармониялул, Дагъусттаннал БакIчи Владимир Васильевлул кабакьаврийну.
Бадрижамал Аьлиева
[dropcap]Ф[/dropcap]естиваль тIитIлатIисса шадлугъравух гьуртту хьусса ДР-лул ХIукуматрал председательнал цалчинма хъиривчу Анатолий Карибовлул Республикалул БакIчинал чулухасса барча буллалисса махъ лавхъунни:
— Гьарца шинал республикалий дуллалисса музыкалул байрандалул региондалул культуралул оьрмулуву бугьлагьисса кIану ялу-ялун цIакь ва агьам хъанай бур. Фестивальданул лагрулий музыка ххираминнаща ва муниву за бувчIайминнаща бюхълай бур цIанихсса усттартурал щаллу буллалисса академ музыкалул язими произведенияртту баян, уттизаманнул композитортурал чивчусса цIусса произведениярттащал кIул хьун. ДакI дарцIуну ура «Порт-Петровские Ассамблеи» фестивальданул хъунмасса бучIантIимур бушиврий, — тIий бия Президентнал ихтилатраву.
Шадлугърай мукунма гьуртту хьунни ДР-лул культуралул министрнал буржру чIумуйну биттур буллалисса Зарема Буттаева, захIматрал ва социал хьхьичIуннайшиврул министрнал буржру чIумуйну биттур буллалисса Расул Ибрагьимов, КIулшиврул, элмулул, культуралул, жагьилтурал иширттал, спортрал ва туризмалул иширттал комитетрал председательнал хъиривчу Анна Безрукова, Республикалул БакIчинал ва ХIукуматрал Администрациялул управлениялул бакIчинал хъиривчу Рашия Аьлиева.
[dropcap]Ф[/dropcap]естивальданул цалчинсса кьини тIиртIунни дунияллийх цIа дурксса музыкантътурал: Турциянавасса балайчи Сибель Косел ва Санкт-Петербурграясса джазрал пианист, продюсер Алексей Черемизовлуя, дачIучи Вячеслав Великийя ва контрабасист Владимир Кольцов-Крутовлуя сакин хьусса Триолул.
